Eýropa lıgasy: «Astananyń» alǵashqy kezdesýine boljam qandaı
ASTANA. QazAqparat - Búgin, 20 qyrkúıekte elordalyq «Astana» fýtboldan Eýropa lıgasy toptyq kezeńiniń oıyndaryn bastaıdy. Alǵashqy kezdesýin Ýkraınanyń «Dınamo» (Kıev) komandasymen ótkizedi, dep habarlaıdy QazAqparat tilshisi.
«Dınamo» bizdiń qazaqstandyq jankúıerlerge jaqsy tanys. Bul komanda keńestik kezeńde aldyńǵy qatarly klýbtardyń biri sanaldy. 1927 jyly qurylǵan komanda 13 márte KSRO chempıony ataǵyn jeńip alsa, 9 márte kýbokqa ıe boldy. Sondaı-aq, 1975, 1986 jyldarda ÝEFA-nyń bedeldi básekesi - Kýbok ıegerleri oıynynda barlyǵynan ozyq shyqty. Buǵan deıin mundaı joǵary tabysqa qol sozǵan postkeńestik komanda bolǵan emes. «Dınamo» Ýkraınanyń tól birinshiliginde de aldyńǵy qatardan kórinip keledi. Olar 15 márte chempıon atansa, 11 márte ulttyq kýbokqa qol sozdy. Halyqaralyq fýtbol tarıhy men statıstıkasy federatsııasynyń sheshimimen HH ǵasyrdyń úzdik 16 komandasy qataryna qosyldy.
Ádette, «Dınamo» degende áıgili bapker Valerıı Lobanovskıı oıǵa oralady. 1974 jyly ol komandaǵa bas bapker qyzmetine shaqyrtý aldy. Odan keıingi 17 jylda bul qyzmetti úzdiksiz atqardy. Osy jyldarda «Dınamo» keńestik komandalar arasynda joǵary bedelge ıe boldy. Birneshe márte chempıondyq ataqqa qol sozdy. Kýbok ıegerleri kýbogyn alsa, Sýperkýbok jeńimpazy da boldy. Valerıı Lobanovskıı 1986 jyly KSRO quramasynyń bas bapkeri qyzmetinde boldy. Sol jylǵy álem birinshiliginde 1/8 fınalda Belgııa quramasynan áreń jeńilgeni jankúıerler jadynan shyǵa qoıǵan joq. Qurama oıynshylarynyń deni «Dınamo» sapynda oıyn kórsetetin.
Osyndaı tolaǵaı tabystary «Dınamo» komandasyn joǵary kóterdi. Komanda sapynda esimi altyn áriptermen jazylǵan talaı myqty shyqty. Solardyń biri - Oleg Blohın. Ol 1975 jyly «Altyn dop» ıegeri atandy. Bul ataqqa 2004 jyly «Dınamonyń» taǵy bir túlegi Andreı Shevchenko ıe boldy. A.Shevchenko sol jyldarda Italııanyń áıgili «Inter» komandasynda oıyn kórsetetin. Mundaı oıynshylar «Dınamodan» kóp shyqty. Olardyń barlyǵy jankúıerler jadynda saqtalyp qaldy.
«Astana» men «Dınamo» buryn-sońdy jasyl alań tórinde kezdesip kórgen emes. Dese de, «Dınamo» 2013 jyly Eýropa lıgasy pleı-off kezeńinde elimizdiń «Aqtóbe» komandasymen jolyqqan edi. Aqtóbede 3:2 esebimen jeńiske jetken olar óz alańynda 5:2 esebimen oısyrata jeńdi.
Árıne, «Aqtóbe» men «Astanany» salystyrýǵa kelmeıdi. «Astana» - búginde áleýeti joǵary komanda. Talaı myqty fýtbolshyny qataryna tartty. Sońǵy tórt jylda úzdiksiz eýrokýbok oıyndarynyń toptyq kezeńinde baq synap keledi. Kóptegen bedeldi klýbtarmen terezesi teń deńgeıde oıyn kórsetti. Komanda basshylary bıyl da sondaı jınaqy qımylymen kózge túsip, jankúıer senimin aqtaýǵa kúsh salatynyn aıtyp júr.
«Dınamo» bıyl bastapqyda Chempıondar lıgasy úshinshi irikteý kezeńinde synǵa tústi. Onda Chehııanyń «Slavııa» (Praga) komandasyn (2:0, 1:1) orta jolda qaldyryp, pleı-off kezeńinde Gollandııanyń «Aıaksyna» (1:3, 0:0) ese jiberdi.
Esterińizge sala ketelik, «Astana» alǵashqy irikteý kezeńinde óz alańynda Chernogorııanyń «Sýteskasyn» 1:0 esebimen jeńip, syrt alańda 2:0 esebimen basym tústi. Odan keıin ekinshi irikteý kezeńinde olar Danııanyń «Mıdtıýlland» klýbyn (2:1, 0:0) tize búktirdi. Degenmen úshinshi irikteý kezeńinde Horvatııanyń «Dınamo» (Zagreb) klýbyna (0:2, 0:1) ese jiberip qoıdy. Eýropa lıgasy pleı-off kezeńinde Kıprdiń APOEL klýbynan syrt alańda 0:1 esebimen jeńilip, óz alańynda dál osy eseppen jeńiske jetti. Jeńimpaz oıyn sońyndaǵy penaltı tebý arqyly anyqtaldy.
Búgingi kezdesý Astana ýaqytymen 23.00-de bastalady. Oıyn «Qazsport» tikeleı efırinde kórsetiledi.
