Eýropa lıgasy: «Astana» jáne «Qaısardyń» qarsylastary elimizge keldi
NUR-SULTAN. QazAqparat - Eýropa lıgasynda synǵa túsetin «Astana» jáne «Qaısar» klýbtarynyń qarsylastary elimizge keldi, dep habarlaıdy QazAqparat tilshisi.
Esterińizge sala ketelik, atalǵan týrnırdiń ekinshi irikteý satysynda óz alańynda «Astana» - Chernogorııanyń «Býdýchnost», «Qaısar» - Kıprdiń APOEL klýbtaryn qabyldaıdy. Sondaı-aq, Almatynyń «Qaıraty» Izraılde «Makkabı» (Haıfa) komandasymen sheberlik baıqasady.
«Astana» bıyl segizinshi márte baq synap otyr. 2015 jyly Chempıondar lıgasy toptyq kezeńinde oınasa, 2016, 2017, 2018, 2019 jyldarda Eýropa lıgasy toptyq kezeńinde el namysyn qorǵady. 2017 jyly Eýropa lıgasynda týrnırdiń 1/16 fınalyna deıin jetti.
«Astana» men «Býdýchnost» komandalary arasyndaǵy oıyn erteń 17 qyrkúıek elorda ýaqytymen saǵat 20.00-de bastalady. Kezdesý Almaty qalasyndaǵy ortalyq stadıonda ótkiziledi.
«Qaısar» eýrokýbok oıyndarynda tuńǵysh márte qatysady. Komanda byltyr Qazaqstan kýbogyn tóbesine kóterdi. Qyzylordalyq klýb 1999, 2000 jyldarda Azııa kýbok ıeleri kýbogynda elimizdiń atynan qatysqan bolatyn.
«Qaısar» men APOEL komandalary arasyndaǵy oıyn 17 qyrkúıekte elorda ýaqytymen 18.00-de bastalady. Kezdesý Shymkent qalasyndaǵy Q.Muńaıtpasov atyndaǵy stadıonda bolady.
Al «Qaırat» eýrokýbok oıyndaryna bıyl onynshy márte qatysady. 2005 jyly Chempıondar lıgasy birinshi irikteý satysynda baq synady. Qalǵanynda Eýropa lıgasy (ÝEFA kýbogy) týrnırinde el namysyn qorǵady.
«Makkabı» (Haıfa) men «Qaırat» arasyndaǵy kezdesý erteń elorda ýaqytymen 23.00-de bastalady.
Qazaqstandyq klýbtardyń qatysýymen ótetin barlyq oıyn «Qazsport» telearnasynan tikeleı efırde kórsetiledi .
