Eýropa lıgasy: «Astana» sońǵy oıynda jeńiske jete ala ma
NUR-SULTAN. QazAqparat - Búgin fýtboldan UEFA Eýropa lıgasy toptyq kezeńi máresine jetedi. Elordalyq «Astana» syrt alańda Serbııanyń «Partızan» (Belgrad) komandasymen kezdesedi, dep habarlaıdy QazAqparat tilshisi.
Esterińizge sala ketelik, eki komanda L tobynda synǵa túsedi. Aıta ketelik, ekeýi de bir týr buryn jarysty jalǵastyrý múmkindiginen syrt qalyp qoıdy. Degenmen búgingi kezdesýde atalmysh topta eki komandanyń qaısysy úshinshi oryn alady degen saýaldyń jaýaby tabylady. Sol sebepti oıyn tartysty órbıdi degen úmit bar.
«Astana» alǵashqy tórt týrda birde-bir upaıǵa qol jetkize alǵan joq. Aldymen Anglııanyń syrt alańda «Manchester ıÝnaıted» komandasynan 0:1, óz alańynda «Partızannan» 1:2 esebimen jeńilip qaldy. Odan keıingi kezekte Gollandııanyń «AZ Alkmar» klýbynan syrtta 0:6, elordada 0:5 esebimen ese jiberdi. Besinshi týrda elordada Anglııanyń «Manchester ıÝnaıted» klýbyn 2:1 esebimen tize búktirip , toptyq kezeńdegi alǵashqy úsh upaıyna qol jetkizdi. Nátıjesinde ázirge enshimizde nebári úsh qana upaı bar. Al úshinshi oryndaǵy «Partızan» qorjynynda bes upaı jazylǵan.
«Astana» oıynshylary sońǵy kezdesýde jankúıer kóńilinen shyǵýdy aldyna maqsat etip otyr. Dese de birqatar fýtbolshylar jaraqat alyp qalýyna baılanysty bul kezdesýge qatyspaıdy. Olardyń qatarynda Marın Tomasov, Fırmın Mýbele syndy fýtbolshylar bar. Sondyqtan atalmysh kezdesýde olardyń ornyn kimderdiń basatyny ázirge belgisiz bolyp otyr.
«Partızan» komandasy – Serbııanyń belgili klýbtarynyń biri. Komanda 1945 jyldyń 4 qazanynda qurylǵan. Serbııa astanasy - Belgrad qalasynyń namysyn qorǵaıdy. Óz elinde joǵary jetistikterge qol jetkizgen belgili klýbtardyń biri sanalady. Búgingi kúnge deıin komanda barlyǵy 46 júldege qol jetkizgen. Onyń ishinde 27 márte el chempıony atansa, 16 márte ulttyq kýbokty tóbesine kóterdi. Budan basqa da jetistikteri az emes.
Komandanyń «Partızan» atalý sebebi de bar. Atalmysh klýb ekinshi dúnıejúzilik soǵys aıaqtalǵan jyly qurylǵan. Komanda quramyna negizinen serb partızandary tartyldy. Sondyqtan atalmysh klýbqa sol ataý tańdalyp alyndy.
Aıta keterligi, búgin «Astana» Eýropa lıgasyndaǵy 46 oıynyn ótkizedi. Búgingi kúnge deıin elordalyq klýb 16 márte jeńiske jetip, 19 oıynda qarsylasyna ese jiberdi. Qalǵan oıyndarda teń nátıje tirkeldi. Qarsylastar qaqpasyna 63 gol soǵyp, óz qaqpasyna 69 gol jeberip aldy.
Búgingi oıynnan keıin «Astana» fýtbolshylary qysqy demalysqa ketedi. Komandanyń bas bapkeri Roman Grıgorchýk qyzmetinde qala ma? Ázirge bul jóninde naqty sheshim aıtý qıyn. Dese de keıbir aqparat quraldary elordalyq klýbtyń bas bapkeri qyzmetine basqa mamannyń kelýi múmkin ekenin jarysa jazyp jatqan jaıy bar.
L tobynan jarysty jalǵastyrýǵa Anglııanyń «Manchester ıÝnaıted» jáne Gollandııanyń «AZ Alkmaar» komandalary múmkindik aldy. Eki komanda birinshi oryn kimge buıyratynyn sarapqa salady.
