Eýropa lıgasy: «Astana» «Partızandy» jeńe ala ma
NUR-SULTAN. QazAqparat - Búgin UEFA Eýropa lıgasy toptyq kezeńindegi ekinshi týr oıyndary ótedi. Elordalyq «Astana» óz alańynda Serbııanyń «Partızan» komandasyn qabyldaıdy, dep habarlaıdy QazAqparat tilshisi.
«Astana» klýby L tobynda synǵa túsedi. Qarsylastary - «Manchester ıÝnaıted» (Anglııa), AZ «Alkmar» (Gollandııa) jáne «Partızan» (Serbııa). Budan buryn «Astana» syrt alańda «Manchester ıÝnaıted» klýbynan 0:1 esebimen jeńilip qaldy.
Al «Partızan» óz alańynda AZ «Alkmar» klýbymen 2:2 esebimen teń tústi.
«Partızan» 1945 jyldyń 4 qazanynda qurylǵan. Serbııa astanasy – Belgrad qalasynyń namysyn qorǵaıdy. Óz elinnde joǵary jetistikterge qol jetkizgen belgili klýbtardyń biri sanalady. Búgingi kúnge deıin komanda barlyǵy 46 júldege qol jetkizgen. Onyń ishinde 27 márte el chempıony atansa, 16 márte ulttyq kýbokty tóbesine kóterdi. Budan basqa da jetistikteri az emes.
Komandanyń «Partızan» atalý sebebi de bar. Atalmysh klýb ekinshi dúnıejúzilik soǵys aıaqtalǵan jyly qurylǵan. Komanda quramyna negizinen serb partızandary tartyldy. Sondyqtan atalmysh klýbqa sol ataý tańdalyp alyndy. «Partızan» qurylǵan kúninen bir kún ótkennen keıin Serbııa ulttyq quramasymen kezdesý ótkizdi. Bul kezdesýde 4:2 esebimen jeńiske jetti. 1946/1947 jylǵy kezeńde ıÝgoslavııa chempıonatynda chempıon atanyp úlgerdi.
«Partızan» 1965/1966 jylǵy kezeńde Eýropa chempıondary kýbogynda táp-táýir nátıjege qol jetkizdi. Sol joly komanda atalmysh týrnırdiń fınaldyq kezeńine deıin súrinbeı jetti. Fınalda Ispanııanyń «Real Madrıd» klýbymen sheberlik baıqasty. Oıynnyń 70-mınýtyna deıin serb fýtbolshylary 1:0 esebimen alda turǵan edi. Degenmen kezdesý 2:1 esebimen ıspandyq klýbtyń jeńisimen aıaqtaldy. Bul jeńilisine qaramastan atalmysh oqıǵa komanda tarıhynda altyn áriptermen jazylyp qaldy. Sondaı-aq, bul komanda 1955/1956, 1963/1964 jylǵy kezeńderde atalmysh týrnırdiń fınaldyq satysyna deıin jetti. Óz eliniń birinshiliginde «Tsrvena Zvezda» komandasymen únemi básekege túsip jatady. Jergilikti jankúıerler eki komanda arasyndaǵy básekeni árdaıym asyǵa kútedi.
«Partızan» qazaqstandyq klýbtarmen buǵan deıin joly túıisken emes. Sondyqtan «Astanamen» oıyn olar úshin tarıhı kezdesýdiń biri bolady. «Astana» quramynda Nenad Erıch, Antonıo Rýkavına syndy serb fýtbolshylary bar.
Búgingi kezdesý elorda ýaqytymen 20.50-de bastalady. Kezdesý Qazaqstan telearnasynan tikeleı efırde kórsetiledi.
