Eýropa lıgasy: «Astana» maltalyq klýbty jeńe ala ma
NUR-SULTAN. QazAqparat - Búgin fýtboldan UEFA Eýropa lıgasy úshinshi irikteý satysynda elordalyq «Astana» Maltanyń «Valletta» komandasyn qabyldaıdy, dep habarlaıdy QazAqparat tilshisi.
Esterińizge sala ketelik, «Astana» eýrokýbok oıyndaryn Chempıondar lıgasy birinshi irikteý satysynan bastap, onda Rýmynııanyń ChFR komandasyna jol berdi. Odan keıin Eýropa lıgasy ekinshi irikteý satysynda Andorranyń «Santa-Koloma» klýbyn orta jolda qaldyryp ketti.
Al «Valletta» Chempıondar lıgasy birinshi irikteý satysynda Lıýksembýrgtiń «Dıýdelanj» komandasynan basym túskenimen, odan keıin Vengrııanyń «Ferentsvarosh» klýbyna shamasy kelgen joq.
«Valletta» komandasy Maltanyń belgili klýbtarynyń biri sanalady. Ol el astanasy - Valletta qalasynda 1943 jyly jergilikti «Valletta Prestons», «Valletta Sant Paýls» jáne «Valletta ıÝnaıted» sekildi úsh komandanyń birigýi nátıjesinde qurylǵan. Búgingi kúnge deıin «Valletta» Malta birinshiliginde 25 márte chempıon atanyp úlgerdi. Bul jóninen «Slıma Ýonderers» jáne «Florıana» komandalarymen qatarlas keledi. Sondaı-aq, «Valletta» el birinshiliginde 18 márte kúmis, 21 márte qola júldeger atanǵan. Oǵan qosa 13 márte Malta kýbogyn enshiledi. Qysqasha aıtqanda, atalmysh komanda qurylǵannan beri árdaıym júldegerler qatarynan kórinip júr.
Maltalyq klýb eýrokýbok oıyndaryna 1963 jyldan beri qatysyp keledi. 1993 jylǵa deıin olar birde-bir márte qarsylastarynan upaı ala alǵan joq. Sol jyly ÝEFA kýbogynda Rýmynııanyń «Rapıd» (Býharest) komandasymen 1:1 esebimen teń tústi. Degenmen óz alańynda 2:6 esebimen jeńilip qaldy.
Byltyr «Valletta» óz eliniń birinshiliginde 58 upaı jınap, týrnır kestesinde birinshi orynnan kórindi. Qarsylasy - «Hıbernıans» komandasy da dál sondaı upaı jınaan edi. Olardyń jeńisi, teń túsýi jáne jeńilisi birdeı boldy. Jeńimpaz dop aıyrmasy arqyly anyqtaldy.
Búgingi kúni komandaǵa jergilikti maman Darren Abdılla bapkerlik jasaıdy. Ol «Valletta» klýbyna kelgenge deıin «Gzıra ıÝnaıted» komandasynda bas bapker jáne sporttyq dırektor qyzmetterin atqarǵan. 2019 jyldyń mamyr aıynan bastap Darren Abdılla «Valletta» komandasynyń tizginin ustady.
«Valletta» óz alańyndaǵy oıyndaryn Ulttyq stadıonda ótkizedi. Stadıon 17 myńnan astam jankúıerdi qabyldaı alady.
«Astana» men «Valleta» komandalary arasyndaǵy kezdesý Nur-Sultan ýaqytymen 20.00-de bastalady. Kezdesý Qazsport telearnasynan tikeleı efırde kórsetiledi.
Foto: vk.com/astanafootballclub
