Eýropa lıgasy: «Astana» «Dınamony» óz alańynda qabyldaıdy
ASTANA. QazAqparat - Búgin fýtboldan Eýropa lıgasy toptyq kezeńinde besinshi týr oıyndary ótedi. Elordalyq «Astana» óz alańynda Kıevtiń «Dınamo» komandasyn qabyldaıdy, dep habarlaıdy QazAqparat tilshisi.
K tobyndaǵy qos komanda alǵashqy týrda ózara sheberlik baıqasqan edi. Ýkraına astanasy - Kıevte bolǵan oıynda eki klýb 2:2 esebinde tarqasqan bolatyn. Odan beri «Astana» eki márte jeńiske jetip, bir teń nátıjege qanaǵat bildirdi. Óz alańynda Frantsııanyń «Renn» klýbyn 2:0 esebimen jeńse, bizdiń jigitter sosyn syrtta Chehııanyń «ıAblonets» klýbymen 1:1 esebimen teń oınady. Atalmysh komandamen úsh apta buryn elorda tórinde qarymta oıyn ótkizip, bul kezdesýde 2:1 esebimen jeńiske jetti.
Alǵashqy týrdan keıin «Dınamo» shıraqtyq tanytty. Odan keıin syrtta «ıAblonetspen» 2:2 esebimen teń oınady. Sońǵy eki kezdesýinde aýadaı qajetti alty upaıdy qorjynǵa saldy. Aldymen syrtta «Renndi» 2:1 esebimen tize búktirip, odan keıin óz alańynda sol klýbtan 3:1 esebimen aılasyn asyrdy.
Qazirgi tańda eki komandanyń enshisinde segiz-segizden upaı bar. Alǵashqy eki oryndy ózara bólisip tur. Búgingi kezdesý birinshi oryn kimge buıyratynyn sheshedi. Sondyqtan eki komanda da baryn salary anyq. «Dınamo» qaı kezde de Ýkraınanyń úzdik komandasy sanalady. Sol bıiginen búginde de tómen túsip kórgen emes. Óz elinde 15 márte el chempıony ataǵyn jeńip aldy. Bul - rekordtyq kórsetkish. Sondaı-aq, 9 márte kúmis júldeger atansa, 2013 jyly qola júldege qanaǵat bildirdi. KSRO kezinde de «Dınamo» chempıondyqqa qol jetkizýden rekordtyq kórsetkishti baǵyndyryp, altyn medaldi 13 márte alǵan.
Býkmekerlik keńseler búgingi oıynda «Astanaǵa» basymdyq berip otyr. Degenmen fýtboldan bári de múmkin. Shyn myqtyny jasyl alań ústindegi shaıqas anyqtaıdy. Eki komanda oǵan tastúıin daıyndyǵyn jasap otyr. Qazir Ýkraına birinshiligi áli de jalǵasyp jatyr. «Dınamo» týrnır kestesinde úshinshi orynda tur. Búgingi qarsylasymyz 25 qarashada syrt alańda «Aleksandrııa» komandasynan 1:2 esebimen jeńilip qaldy. «Dınamo» týrnır kestesinde birinshi orynda kele jatqan Donetskiniń «Shahterinen» toǵyz upaıǵa artta qalǵan. Al fýtboldan Qazaqstan birinshiligi 11 qarashada máresine jetip, «Astana» qatarynan besinshi márte chempıon ataǵyna ıe bolǵan edi. Odan beri elordalyq klýbtyń birqatar fýtbolshylary Ulttar lıgasynda óz elderiniń quramalary sapynda oıyn kórsetip qaıtty.
Eki komanda sapynan jaraqat alǵandar joq. Degenmen «Dınamo» bapkerleri qorǵaýshy Nıkıta Býrdanyń oıynǵa qatysa almaýy múmkin ekendigin aıtady. «Astana» sapynda mundaı fýtbolshylar joq.
Esterińizge sala ketelik, atalmysh kezdesý búgin Astana ýaqytymen saǵat 21.45-te bastalady. Oıyndy Qazsport telearnasy tikeleı efırde kórsetiledi. Sondaı-aq, búgin atalmysh K tobyndaǵy «ıAblonets» jáne «Renn» komandalary ózara kezdesedi.
