Eýropa lıgasy: «Astana» belarýstyq BATE-ni ekinshi márte jeńe ala ma
NUR-SULTAN. QazAqparat - Búgin fýtboldan UEFA Eýropa lıgasy pleı-off satysynyń alǵashqy oıyndary ótedi. Elordalyq «Astana» Belarýstiń BATE komandasyn qabyldaıdy, dep habarlaıdy QazAqparat tilshisi.
Eki komanda da bıylǵy Eýrokýbok oıyndaryn UEFA Chempıondar lıgasynda bastady. Atalmysh dúbirli dodanyń birinshi satysynda «Astana» Rýmynııanyń ChFR komandasyna jol berdi. Odan keıin Eýropa lıgasy ekinshi satysynda Andorranyń «Santa-Koloma», úshinshi satysynda Maltanyń «Valletta» komandalaryn orta jolda qaldyrdy. Osylaısha, «Astana» jarystyń pleı-off satysyna joldama aldy.
BATE Chempıondar lıgasynyń birinshi satysynda Polshanyń «Pıast» komandasynan basym tússe, odan keıin Norvegııanyń «Rýsenborg» klýbyna ese jiberip qoıdy. Kelesi kezekte Eýropa lıgasy úshinshi irikteý satysynda Bosnııanyń «Saraevo» klýbyn tize búktirdi.
BATE elimizkomandalaryna jaqsy tanys. Eýrokýbok oıyndarynda budan burynǵy jyldarda da sheberlik baıqasty. Aldymen 2013 jyly Chempıondar lıgasy ekinshi irikteý satysynda Qaraǵandynyń «Shahterynan» óz alańynda 0:1 esebimen jeńilse, syrt alańda da dál sol eseppen ese jiberdi. Belarýs klýby odan keıin 2016 jyly Eýropa lıgasy pleı-off kezeńinde elordalyq «Astana» klýbymen jolyqty. Alǵashqy kezdesýde syrt alańda olar qarsylasyna 0:2 esebimen jol berse, araǵa apta salyp óz alańynda 2:2 esebimen teń tústi. Osylaısha, eki márte qazaqstandyq klýbtardan aınalyp óte alǵan joq.
Búgingi qarsylasymyz áýelgide 1973 jyly Borısov avtotraktor elektrjabdyqtary zaýyty bazasynda qurylǵan. Sol kezeńde komanda Belarýs birinshiliginde oıyn kórsetti. Onda úsh márte chempıon atansa, bir márte kúmis júldeger boldy. Degenmen 1984 jyly komanda tarap ketti. Al araǵa on eki jyl úzilis salyp 1996 jyly qaıtadan quryldy. Sodan beri óz eliniń birinshiliginde úzdik klýbtar qataryna qosyldy. Aıta keterligi, borısovtik klýb óz eliniń birinshiliginde 15 márte (1999, 2002, 2006-2018) chempıondyq tuǵyrǵa kóterilse, 4 márte kúmis, 1 márte qola medal aldy. Sondaı-aq, eýrokýbok oıyndarynda toptyq kezeńge jıi joldama alyp keledi. Atap aıtqanda, olar Chempıondar lıgasynda bes, Eýropa lıgasynda 3 márte toptyq kezeńde baq synady.
Búginde komandaǵa Alekseı Baga bapkerlik jasaıdy. Ol komanda sapynda 1998-2006 jyldarda oıyn kórsetken. 2011 jyldan beri bapkerlik qyzmetke bet burǵan tájirıbeli maman byltyrdan beri BATE klýbynyń tizginin ustady.
«Astana» men BATE komandalary arasyndaǵy búgingi kezdesý Nur-Sultan ýaqytymen 20.00-de bastalady. Oıyn Qazsport telearnasynan tikeleı efırde kórsetiledi. Qarymta oıyn 29 tamyzda Borısov qalasynda ótkiziledi.
