Eýropa lıgasy: «Astana» AZ «Alkmardy» jeńe ala ma
NUR-SULTAN. QazAqparat - Búgin elordalyq «Astana» fýtboldan UEFA Eýropa lıgasy toptyq kezeńindegi kezekti oıynyn Gollandııanyń AZ «Alkmar» komandasyna qarsy ótkizedi, dep habarlaıdy QazAqparat tilshisi.
Esterińizge sala ketelik, budan buryn «Astana» toptyq kezeńde eki oıyn ótkizip úlgerdi. Aldymen syrt alańda Anglııanyń «Manchester ıýnaıted» klýbynan 0:1 esebimen jeńilse, odan keıin óz alańynda Serbııanyń «Partızanyna» 1:2 esebimen jol berdi. Sondyqtan elordalyq klýb búgingi oıynda jeńiske jetýge bar kúshin salatyny anyq. Sebebi, jeńiske jetpegen jaǵdaıda «Astana» úshin jarysty jalǵastyrý múmkindigi qıyndaı túsedi.
AZ «Alkmar» komandasy da ońaı shaǵylatyn jańǵaq emes. Óz elinde eki márte chempıon atanǵan klýb eýrokýbok oıyndaryna turaqty túrde qatysyp keledi. Komanda 1967 jyly qurylǵan. Sol jyly atalmysh qaladaǵy «Alkmar’54» jáne «Zanstrek» klýbtary biriktirildi. Sodan beri komanda tarıhy jazylyp keledi. Gollandııa chempıonatynda eki márte chempıon atanǵan komanda tórt márte sol eldiń kýbogyn tóbesine kóterdi. Sondaı-aq, 1980/1981 jylǵy kezeńde UEFA kýbogy fınalyna deıin jetti. Fınalda olar Anglııanyń «Ipsvıch Taýn» komandasymen sheberlik baıqasty. Aldymen olar 6 mamyrda syrt alańda atalmysh qarsylasynan 0:3 esebimen oısyraı jeńildi. Al 20 mamyrda óz alańynda ótkizilgen kezdesýde aǵylshyn klýbynan 4:2 esebimen basym tústi. Budan keıin ondaı tolaıym tabystarǵa qol jetkize almaı keledi.
Atalmysh klýb budan buryn eýrokýbok oıyndarynda qazaqstandyq komandalarmen kezdesti. Aldymen 2010 jyly Eýropa lıgasy pleı-off kezeńinde «Aqtóbemen» joly túıisti. Gollandııalyq klýb 19 tamyzda óz alańynda ótken kezdesýde 2:0 esebimen basym tússe, 26 tamyzda qarsylasynan 1:2 esebimen jeńildi.
Odan keıin 2018 jyly Eýropa lıgasy ekinshi irikteý kezeńinde Almatynyń «Qaırat» komandasymen joly túıisti. Áýeli 26 shildede syrt alańda atalmysh qarsylasynan 0:2 esebimen jeńilse, óz alańynda 2:1 esebimen jeńiske jetti. Nátıjesinde qos oıynnyń nátıjesimen qarsylasyna jol berip qoıdy.
Bıyl AZ «Alkmar» ekinshi irikteý satysynan bastady. Aldymen Shvetsııanyń «Hekken» komandasyn orta jolda qaldyrdy. Odan keıin Ýkraınanyń «Marıýpol», Belgııanyń «Antverpen» klýbtaryn tize búktirdi. Osylaısha toptyq kezeńge joldama aldy. Toptyq kezeńniń alǵashqy kezdesýinde syrt alańda «Partızanmen» 2:2 esebimen teń tússe, odan keıin óz alańynda «Manchester ıýnaıtedpen» 0:0 esebine qanaǵat bildirdi.
«Astana» komandasy qatarynan búgingi oıynǵa Marın Tomasov qatysa almaıdy. Ol Qazaqstan chempıonatyndaǵy sońǵy Almatynyń «Qaıratymen» kezdesýde jaraqat alyp qaldy.
Foto: fcastana.kz
