Eýropa lıgasy: «Astana» APOEL klýbynan jeńilip qaldy

Aıta keterligi, bıyl eki komanda da eýrokýbok oıyndaryn Chempıondar lıgasynyń irikteý kezeńinen bastaǵan edi. Kıprlikter birinshi irikteý kezeńinde Lıtvanyń «Sýdýva» komandasymen kezdesti. «Sýdýva» klýbyna qazaqstandyq maman Vladımır Chebýrın jetekshilik etetini belgili. Lıtvalyq klýb APOEL komandasyn óz alańynda 3:1 esebimen tize búktirip, syrt alańda 0:1 esebimen jeńilip qaldy. Qos oıynnyń nátıjesimen «Sýdýva» jarysty jalǵastyrdy. Al APOEL osydan keıin ÝEFA talabyna sáıkes Eýropa lıgasynyń ekinshi irikteý kezeńine tústi. Onda Estonııanyń «Flora» klýbyn óz alańynda 5:0 esebimen basym tússe, syrt alańda 0:2 esebimen ese jiberdi. Dese de qos oıynnyń nátıjesi kıprlik klýbtyń jarysty jalǵastyrýǵa múmkindik jasady. Odan keıin kıprlik komanda Izraıldiń «Hapoel Bezr-Sheva» klýbyn orta jolda (2:2, 3:1) qaldyrdy.

Al «Astanaǵa» buǵan deıin Chempıondar lıgasynda synǵa tústi. Alǵashqy eki kezeńde aldymen Chernogorııanyń «Sýteska» klýbyn  (1:0, 2:0), odan keıin Danııanyń «Mıdtıýllandyn» (2:1, 0:0) artqa tastap ketti. Degenmen úshinshi irikteý kezeńinde olar Horvatııanyń Zagreb qalasynyń «Dınamo» komandasyna qaýqar kórsete (0:2, 0:1) alǵan joq. Sonyń saldarynan endi Eýropa lıgasynyń pleı-off kezeńinde synǵa túsetin boldy.

Eki komanda buǵan deıin de eýrokýbok oıyndarynda sheberlik baıqasty. Alǵash ret olardyń 2015 jyly Chempıondar lıgasynyń pleı-off kezeńinde joly túıisti. Elordada ótken oıynda qarsylasyn 1:0 esebimen jeńgen «Astana» syrt alańda 1:1 esebimen teń nátıjege qol jetkizdi. Osynyń arqasynda olar óz tarıhynda tuńǵysh ret Chempıondar lıgasynyń toptyq kezeńine joldama aldy. Odank keıin eki komanda Eýropa lıgasynda V tobynda synǵa túsip, qos oıynda 2:1 esebimen eki komanda alma-kezek jeńiske jetti.

Búgingi kezdesýde «Astananyń» bas bapker mindetin Grıgorıı Babaıan atqardy. Elordalyq klýbtyń ýkraınalyq bas bapkeri Roman Grıgorchýk Horvatııanyń «Dınamo» klýbynan jeńilisinen keıin belgisiz sebeptermen qyzmetinen ýaqytsha ketkenin málim etti.

Búgingi kezdesýde «Astana» komandasy alǵashqy mınýttan shabýylǵa shyqty. Oıynnyń nebári 1-mınýtynda Laslo Klıaınhaısler alystan shirene dop tepken edi. Ol qaqpadan sál ǵana qıys ketti. Al 2-mınýtta Pedro Enrıke de alań ıeleri qaqpashysyn mazalap kórdi. Birinshi kezeńde budan basqa da gol soǵatyn múmkindikter bolǵan. Alaıda olar dittegen maqsatyna jetpedi. Mundaı múmkindikter APOEL komandasynda da boldy. Dese de olardyń eshbiri golǵa aınalǵan joq.

Ekinshi kezeń bastala salysymen alań ıeleri shabýyl shebin kúsheıtti. Olar óz degenine 81-mınýtta jetti. APOEL oıynshylarynyń biri áýelete tepken dop «Astana» qaqpasy mańdaıshasyna tıip keıin serpilgen edi. Ony APOEL klýbynyń brazılııalyq shabýylshysy Kajý qaqpaǵa baspen urdy. Osylaısha esep ashyldy. Esep 1:0.

Qarymta kezdesý endi 30 tamyzda Astanada ótedi. Jeńimpaz komanda Eýropa lıgasynyń toptyq kezeńinde synǵa túsý múmkindigine ıe bolady. Esterińizge sala ketelik, «Astana» budan burynǵy eki jylda da Eýropa lıgasy toptyq kezeńinde synǵa tústi.