Eýropa lıgasy: «Astana» andorralyq klýbtan aılasyn asyra ma
NUR-SULTAN. QazAqparat - Búgin fýtboldan UEFA Eýropa lıgasy ekinshi irikteý kezeńinde elordalyq «Astana» syrt alańda Andorranyń «Santa-Koloma» komandasymen kezdesedi, dep habarlaıdy QazAqparat tilshisi.
Esterińizge sala ketelik, «Astana» bıyl eýrokýbok oıyndaryn UEFA Chempıondar lıgasy birinshi irikteý kezeńinen bastaǵan edi. Onda Rýmynııanyń ChFR komandasyna jol berdi.
Al «Santa-Koloma» jarysty atalmysh týrnırdiń aldyn ala irikteý satysynan bastady. Aldymen aldyn ala irikteý satysynyń jartylaı fınalynda San-Marınonyń «Tıre Penne» komandasyn 1:0 esebimen jeńip, odan keıin fınalda Kosovonyń «Ferronıkelı» klýbyna 1:2 esebimen jol berdi. Osylaısha Eýropa lıgasy ekinshi irikteý satysyna qatysatyn boldy.
«Santa-Koloma» – elindegi tájirıbeli klýbynyń biri sanalady. Komanda 1986 jyly qurylǵan. Búgingi kúnge deıin 13 márte Andorra chempıonatynda altynnan alqa taqty. Sońǵy alty jyldan beri chempıondyq tuǵyrǵa turaqty túrde kóterilip keledi. Eýrokýbok oıyndarynda ázirge joǵary jetistigimen jankúıerdi qýanta almaı keledi. Tek 2014 jyly Chempıondar lıgasy birinshi irikteý satysynda Armenııanyń «Banants» komandasyn orta jolda (1:0, 2:3) qaldyryp ketti. Onda syrt alańda soqqan goldyń esebinen jarysty jalǵastyrýǵa múmkindik aldy. Degenmen jarystyń kelesi satysynda Izraıldiń «Makkabı» (Tel-Avıv) komandasyna shamasy kelgen joq.
Bıyl komanda quramy birqatar fýtbolshylarmen tolyqty. «Santa-Koloma» sapyna álemniń belgili klýbtarynda tájirıbe jınaqtaǵan Havı Komocha, chılılik Nıkolas Medına syndy jigitter bar.
«Santa-Koloma» sapynan ulttyq qurama sapynda oınaıtyn fýtbolshylar bar. Solardyń biri – Hordı Alaes byltyr 9 qyrkúıekte Ulttar lıgasy aıaıasyndaǵy Andorra quramasynyń Qazaqstanmen ótkizgen kezdesýine qatysty. Sol oıynda gol soǵyp ketti. Nátıjesinde eki qurama 1:1 esebimen teń tústi. Sondaı-aq, atalmysh klýb jeıdesin kıgen Enrık Pı Sola da ulttyq qurama sapynda oıyn kórsetedi. «Santa-Koloma» komandasyna ıspan mamany Mark Rodrıges jetekshilik etedi. Ol klýbtyń joǵary orynnan kórinýine zor úles qosyp keledi.
Kezdesý Andorra-la-Velıa eldi mekenindegi 1 600 adam sııatyn «Komýnal» stadıonynda ótkiziledi. Bul eldi mekende 3 myńǵa tarta adam turady.
«Santa-Koloma» men «Astana» komandalary arasyndaǵy kezdesý Nur-Sultan ýaqytymen 00.00-de bastalady. Tikeleı kórsetilim andorralyq klýbtyń Youtube-kanaly arqyly jasalady dep josparlanyp otyr.
Qos klýbtyń jeńimpazy jarystyń kelesi satysynda búgingi tańda Chempıondar lıgasy ekinshi satysynda synǵa túsip jatqan «Ferentsvarosh» (Vengrııa) jáne «Valletta» (Malta) jubynyń jeńilgen komandasymen sheberlik baıqasady.
Foto: fcastana.kz
