Eýropa lıgasy: «Astana» alǵashqy kezeńnen keıin jeńilip jatyr
ASTANA. QazAqparat - Dál qazir elordadaǵy «Astana-arena» stadıonynda «Astana» men Kıevtiń «Dınamo» komandalary arasyndaǵy kezdesýdiń birinshi kezeńi aıaqtaldy.
Biz budan buryn eki komandanyń búgingi oıynǵa daıyndyǵy jaıynda habarlaǵan edik.
Osy kezdesýge deıin eki komandanyń enshisinde segiz-segiz upaıdan bar. Alǵashqy eki oryndy ózara bólisip tur.
«Astana» komandasy bas bapkeriniń mindetin atqarýshy Grıgorıı Babaıan kezdesýdiń alǵashqy mınýtynan Nenad Erıch, Baktıer Zaınýtdınov, Evgenıı Postnıkov, Marın Anıchıch, Antonıo Rýkavına, Ivan Maevskıı, Laslo Klıaınhaısler, Rıchard Almeıda, Marın Tomasov, Roman Mýrtazaev men Djýnıor Kabanangany shyǵardy. Al «Dınamonyń» bas bapkeri Aleksandr Hatskevıch óz shákirtteri arasynan Denıs Boıko, Nıkıta Býrda, Tamash Kadar, Tomash Kendzera, Vıtalıı Mıkolenko - Che Che, Vladımır Shepelev, Nıkolaı Shaparenko, Sıdkleı Pereıra, Benıamın Verbıch pen Vıktor Tsygankovqa senim bildirdi.
Alǵashqy mınýttan «Astana» oıyn tizginin qolǵa alýǵa tyrysqan edi. Onynshy mınýtqa deıin bizdiń komandada esepti ashatyn birneshe múmkindik boldy. Astanalyq Marın Tomasov qaqpa aldynda nysanany dál kózdeı alǵan joq. Osyndaı kóptegen qaýipti sátter túıindele qoımady. Esesine «Dınamo» oıynshysy Benıamın Verbıch 29-mınýtta óz komandasyn alǵa shyǵardy. Birinshi kezeń osy eseppen aıaqtaldy.
