Eýropa lıgasy: «Aqtóbe» men «Hedd» ekinshi matchyn ótkizedi
ALMATY. 25 shilde. QazAqparat - Búgin Aqtóbede Eýropa lıgasynyń ekinshi irikteý raýndy aıasynda jergilikti «Aqtóbe» fýtbol komandasy Norvegııanyń Ýlsteınvık qalasynyń «Hedd» komandasymen qarymta matchyn ótkizedi.
Aqtóbelikter syrt alańdaǵy alǵashqy matchta 0:1 esebimen utylǵan bolatyn. Bul olardyń Eýropa lıgasy aıasynda Norvegııa komandalarymen alǵashqy kezdesýi edi.
Eger negizi 1919 jyly qalanǵan «Hedd» qazir Norvegııa chempıonatynyń 1-shi dıvızıonynda 16 komandanyń arasynda altynshy orynda kele jatsa, 1967 jyly qurylǵan «Aqtóbe» Qazaqstan Premer-lıgasynda bıyl kósh bastap tur. Sońǵy 3 maýsymda Eýropa lıgasynda baq synap júrgen aqtóbelikter 2010/2011 jylǵy maýsymda pleı-off kezeńinde súrinse, 2011/12 jáne 2012/13 jylǵy maýsymdarda úshinshi irikteý raýndyna deıin jetti. Aldyńǵy jyly Reseıdiń «Alanııa-Vladıkavkaz» komandasymen qos matchta da 1:1 esebimen teń túsken olar penaltı soǵýda ǵana 2:4 esebimen qarsylasyna jol bergen edi. Al byltyr onyń jolyn Belgııanyń «Genk» komandasy kesti. Onda qos match ta 1:2 esebimen aıaqtalǵan bolatyn.
