Eýropa lıgasy: Zaınýtdınov oınaıtyn «Beshıktash» komandasy iri eseppen jeńiske jetti

ASTANA. KAZINFORM – Fýtboldan Eýropa lıgasynyń jetinshi týrynda Túrkııanyń «Beshıktash» komandasy Ystanbulda Ispanııanyń «Atletık» klýbyn qabyldady.

Bıyl ataqty norvegııalyq oıynshy ári bapker Ýle Gýnnar Sýlsher tizginin ustaǵan «Beshıktash» osyǵan deıin Eýropa lıgasynda jalpy kestede 6 upaımen 28-orynda turǵan edi.

Al jeńilmeı kele jatqan «Atletık» (Bılbao) kósh bastaýshylardyń biri edi. Soǵan qaramastan, ystanbuldyq klýb azýly qarsylasyn 4:1 esebimen utty. Mılosh Rashıtsa qos goldyń avtory atansa, Rafa Sılva men Joaý Marıý bir-birden kózge tústi.

Qonaqtardan Ýnaı Gomes jalǵyz doppen jaýap qaıyrdy.

Qazaqstan quramasynyń oıynshysy Baqtıer Zaınýtdınov alańǵa 69-mınýtta shyǵyp, óz komandasynyń jeńiske jetýine úlesin qosty.

Osy jeńisten keıin 9 upaı jınaǵan «Beshıktash» Eýropa lıgasynda 18-orynǵa kóterildi. «Atletık» 16 upaımen ekinshi satyda qaldy.

Bastapqy 24 orynǵa ilikken klýbtar pleı-off kezeńine joldama alady.

«Beshıktash» Túrkııa chempıonatynda 31 upaımen 6-satyda keledi.

Eske sala keteıik, budan buryn búgin ÝEFA Chempıondar lıgasy negizgi kezeńiniń jetinshi týry bastalatynyn jazǵan bolatynbyz.