Eýropa lıgasy: «Tobyl» syrt alańda oısyraı jeńildi
ASTANA. KAZINFORM - Qostanaıdyń «Tobyly» fýtboldan Eýropa lıgasynyń birinshi irikteý kezeńinde Slovakııanyń «Rýjemberok» komandasymen kezdesti.
Oıynnyń birinshi kezeńinde 5 gol soǵyldy. Aldymen «Tobyldyń» jartylaı qorǵaýshysy Igor Ivanovıch 9-mınýtta komandalasy Islam Chesnokovtyń bergen pasyn golǵa aınaldyrdy. Esesine kóp uzamaı slovakııalyq komandadan Shımon Gabrıel 11-mınýtta kózge tústi. Al, 40-mınýtta «Rýjemberok» sapynan Aleksander Seletskı óz komandasyn alǵa shyǵardy.
Oıynnyń 45-mınýtynda qostanaılyq klýb sapynan Igor Ivanovıch komandalasy Davıd Enenge ádemi pas shyǵaryp berdi. Qaqpashymen betpe-bet kelgen Enen dopty qaqpa torynda týlatty. Arada úsh mınýttaı ýaqyt ótkende «Tobyl» qaqpashysy qaqpasyna engen dopty alyp shyǵýǵa májbúr boldy. Slovakııalyq klýb oıynshysy Shımon Gabrıel dýbl avtory atandy.
Ekinshi kezeńde «Rýjemberok» oıynshylary eki gol soǵyp ketti. Ony Mateı Madlenıak 77, Matýsh Maly 88-mınýtta enshisine jazdy. Osylaısha «Tobyl» syrt alańda 2:5 esebimen oısyraı jeńildi.
Qarymta kezdesý 18 shildede ótedi.
Eske salsaq, budan buryn Chempıondar lıgasynyń birinshi irikteý kezeńinde «Ordabasy» óz alańynda moldovalyq «Petrokýb» komandasymen teń túsken bolatyn. Al, «Aqtóbe» Qobylandy batyr atyndaǵy stadıonda jankúıerlerin qýanta almady. Dmıtrıı Parfenov jattyqtyratyn komanda bosnııalyq «Saraevodan» 0:1 esebimen jeńilip qaldy.
