Eýropa lıgasy: «Baıer» syrt alańda «Romany» jeńdi

ASTANA. KAZINFORM - Fýtboldan UEFA Eýropa lıgasy jartylaı fınalyndaǵy alǵashqy oıyndardyń nátıjesi belgili boldy.

Jarystyń atalǵan satysyndaǵy alǵashqy oıynda Italııanyń «Roma» komandasy óz alańynda Germanııanyń «Baıer» komandasyn qabyldady.

Bıyl «Baıer» komandasy óz jankúıerlerin erekshe qýantyp keledi. Óziniń 119 jyldyq tarıhynda atalǵan klýb birde-bir márte Germanııa býndeslıgasynda chempıon ataǵyna qol jetkizip kórmegen edi. Bıyl alǵash ret jeńis tuǵyryna kóterildi. 2022 jyldan beri komanda tizginin ustaǵan ıspanııalyq bapker Havı Alonso «Baıerdi» jetistikke jetelep keledi. Komanda barlyq týrnırde 46 oıyn boıy jeńilistiń aşy dámin tatqan joq.

Búgingi kezdesýde de olar jaqsy oıyn órnegin kórsetti. Kezdesýdiń 28-mınýtynda ıtalııalyq qorǵaýshylardyń qateligin sheber paıdalanǵan Florıan Vırts «Baıerdi» alǵa shyǵardy.

Al 73-mınýtta Robert Andrıh esepti ústemeleı tústi.

Osylaısha «Baıer» qarsylasynan 2:0 esebimen basym tústi.

Sondaı-aq, búgin taǵy bir kezdesýde «Marsel» (Frantsııa) men «Atalanta» (Italııa) 1:1 esebine qanaǵat bildirdi.

Qarymta oıyn 9 mamyrǵa belgilengen.

Eske salsaq, budan buryn Chempıondar lıgasy jartylaı fınalynda alǵashqy oıyndar ótkizildi.