Eýropa lıgasy: «Aqtóbe» syrt alańda «Legııaǵa» ese jiberdi

ASTANA. KAZINFORM — Qazaqstandyq «Aqtóbe» fýtbol komandasy UEFA Eýropa lıgasynyń birinshi irikteý kezeńinde Polshanyń «Legııa» (Varshava) komandasymen alǵashqy oıynyn ótkizdi.

Kezdesý barysynda aqtóbelik klýb sapynan Oralhan Ómirtaev 9-mınýtta gol soqqan edi. Degenmen tóreshi Oralhannyń oıynnan tys qalǵanyn aıtyp, ony sanaǵan joq. Esesine 25-mınýtta Vagan Bıchahchıan soqqan gol «Legııany» alǵa shyǵardy.

Qazaqstandyq komanda tarazy basyn teńestirýge umtyldy. Dese de kózdegen maqsatyna jete almady.

Osylaısha aqtóbelik klýb alǵashqy oıynda qarsylasyna 0:1 esebimen ese jiberdi. 
Qarymta oıyn 17 shilde kúni ótkiziledi.

Eki komanda qazirge deıin bir márte kezdesken edi. 2014 jyly Eýropa lıgasy pleı-off satysynda polshalyq fýtbolshylar «Aqtóbeni» (1:0, 2:0) qapy qaldyrdy.

Eske salsaq, budan buryn almatylyq «Qaırat» UEFA Chempıondar lıgasynyń birinshi irikteý kezeńinde syrt alańda Slovenııanyń «Olımpııa» klýbymen 1:1 esebimen teń tústi.

Aıta ketsek, shymkenttik «Ordabasy» fýtbol komandasy UEFA Konferentsııa lıgasynyń birinshi irikteý kezeńinde Grýzııanyń «Torpedo» (Kýtaısı) komandasyna 3:4 esebimen ese jiberdi.

Al elordalyq «Astana» atalǵan týrnırdi ekinshi irikteý kezeńinen bastaıdy.