Eýropa kóshbasshylary Ulybrıtanııadaǵy sammıtte qandaı kelisimge keldi

ASTANA. KAZINFORM — Londonda Ulybrıtanııa premer-mınıstri Kır Starmer uıymdastyrǵan eýropalyq kóshbasshylar sammıti máresine jetti, dep jazady VVS.

Sammıttiń basty maqsaty - soǵysty toqtatý josparyn ázirleý.

Derekke qaraǵanda, bul jospar keıinnen Amerıka Qurama Shtattarymen talqylanyp, keıin birge júzege asyrylmaq.

Kezdesýge qatysýshylar kelesi tórt qadamǵa qatysty kelisti:

1. Soǵys júrip jatqan kezde Ýkraınaǵa áskerı kómek kórsetýdi jalǵastyrý jáne Reseıge ekonomıkalyq qysymdy kúsheıtý.
2. Kez kelgen turaqty beıbitshilik Ýkraınanyń egemendigi men qaýipsizdigin qamtamasyz etýi kerek, al Ýkraına kelissózder ústelinde bolýy tıis.
3. Eger beıbit kelisimge qol jetkizilse, eýropalyq kóshbasshylar Reseıdiń Ýkraınaǵa bolashaqta kez kelgen basyp kirýine jol bermeýge tyrysady.
4. Ýkraınany qorǵaý jáne eldegi beıbitshilikti qamtamasyz etý úshin «qalaýlylar koalıtsııasy» qurylady.

Londondaǵy sammıt qorytyndysy boıynsha ótken baspasóz máslıhatynda Ulybrıtanııa premer-mınıstri kóshbasshylar osy qarqyndy saqtaý jáne ortaq jospar boıynsha jumysty jalǵastyrý úshin jaqyn arada qaıta kezdesýge keliskenin aıtty.

- Búgin biz tarıhtyń toǵysqan tusynda turmyz», - dedi ol. - Qazir bos áńgimeniń ýaqyty emes, ádil jáne turaqty beıbitshilikke qol jetkizý úshin jańa jospardyń aınalasynda áreket etý jáne birigý ýaqyty keldi.

Aıta keteıik, buǵan deıin Ýkraına Ulybrıtanııadan 3,2 mıllıard dollar qorǵanys nesıesin alatynyn jazǵanbyz.