Eýropa Keńesiniń Parlamenttik Assambleıasy Qazaqstan reformalaryn joǵary baǵalady
ASTANA.KAZINFORM — QR Parlamenti Senatynyń Tóraǵasy Máýlen Áshimbaev Strasbýrgte ótip jatqan Eýropa Keńesi Parlamenttik Assambleıasynyń kúzgi sessııasyna qatysty, dep habarlaıdy Kazinform agenttiginiń menshikti tilshisi.
Kún tártibinde Qazaqstan men Eýropa Keńesi arasyndaǵy ekijaqty yntymaqtastyqty odan ári damytý máseleleri qaraldy.
Seısenbi kúni Senat Tóraǵasy Máýlen Áshimbaev EKPA tóraǵasy Teodoros Rýsopýlospen, Eýropa Keńesiniń Bas hatshysy Alen Bersemen jáne EKPA-nyń Qazaqstan boıynsha baıandamashysy Jolt Nemetpen (Vengrııa) ekijaqty kezdesýler ótkizdi.
EKPA tóraǵasymen kezdesý qorytyndysy boıynsha birlesken málimdeme qabyldandy.
— Búgin Eýropa Keńesiniń Parlamenttik Assambleıasy Qazaqstandaǵy demokratııalyq reformalardy qoldaıtynyn rastaıtyn qarar qabyldaǵan kezde, biz parlamentaralyq yntymaqtastyqty nyǵaıtýǵa, ınstıtýtsıonaldyq jáne saıası dıalogty tereńdetýge jáne bizdiń ınstıtýttarymyz arasyndaǵy yntymaqtastyq týraly kelisimde kórsetilgendeı ortaq qundylyqtar negizinde ilgerileýge beıim ekenimizdi bildiremiz, — delingen QR Parlamenti Senatynyń tóraǵasy men EKPA tóraǵasynyń birlesken málimdemesinde.
Sondaı-aq qujatta Qazaqstannyń konstıtýtsııalyq jáne saıası reformalar arqyly demokratııalyq ınstıtýttardy nyǵaıtýǵa baǵyttalǵan eleýli kúsh-jigeri, sondaı-aq Eýropa Keńesimen, atap aıtqanda onyń Parlamenttik Assambleıasymen jáne basqa da halyqaralyq seriktestermen belsendi yntymaqtastyǵy úshin joǵary baǵa berilgen.
— Biz Qazaqstannyń ólim jazasyn alyp tastaýyn jáne onyń adam quqyqtaryn qorǵaýǵa degen umtylysyn kórsetetin Azamattyq jáne saıası quqyqtar týraly halyqaralyq paktige Ekinshi fakýltatıvtik hattamany ratıfıkatsııalaýyn quptaımyz. Biz Qazaqstannyń Eýropa Keńesiniń tıisti konventsııalaryna qosylý jónindegi kúsh-jigerin qoldaımyz jáne adam quqyqtaryn, zań ústemdigin jáne demokratııany ilgeriletý jónindegi ortaq mindettememizdi baǵalaımyz, — delingen habarlamada.
Eýropalyq uıym ókilderine Qazaqstanda bolyp jatqan demokratııalyq úderister men aldaǵy parlamenttik reforma týraly tolyq aqparat berildi.
Eýropa Keńesiniń Tóraǵasy men EKPA ókilderi Qazaqstandaǵy reformalardyń, onyń ishinde eýropalyq parlamentarıılerdiń pikirinshe, saıası reformalardy birtutas ınstıtýtsıonaldyq júıege biriktirý arqyly zań shyǵarý úderisi men sheshimder qabyldaýdyń tıimdiligin arttyrýǵa bolatyn bir palataly parlament qurý bastamasyn qosa alǵanda, reformalar barysyn qanaǵattanýshylyqpen atap ótti.
Sonymen qatar, áleýmettik ıntegratsııanyń mańyzdylyǵy jáne Konstıtýtsııalyq Sottyń ulttyq adam quqyqtary júıesindegi róli aıtyldy.
Buǵan deıin eýropalyq sarapshylar Qasym-Jomart Toqaevtyń halyqqa Joldaýynda aıtqan Senatty taratý bastamasyna qatysty pikirlerimen bólisken bolatyn.