Eýropa keńesi Qazaqstandy Sybaılas jemqorlyqqa qarsy memleketter tobyna shaqyrdy

NUR-SULTAN. QazAqparat – Eýropa Keńesi Qazaqstandy Sybaılas jemqorlyqqa qarsy memleketter tobyna qosylýǵa shaqyryp, hat joldady. Bul týraly Sybaılas jemqorlyqqa qarsy is-qımyl agenttiginiń tóraǵasy Oljas Bektenov vedomstvonyń alqa otyrysynda málim etti, dep habarlaıdy QazAqparat tilshisi.

«Shetelge zańsyz shyǵarylǵan qarajat pen múlikti elge qaıtarý úshin halyqaralyq yntymaqtastyqty kúsheıtý kerek. Taıaýda Eýropa keńesinen Qazaqstanǵa eýropalyq Sybaılas jemqorlyq úshin qylmystyq jaýapkershilik týraly konventsııaǵa qosylý jóninde resmı shaqyrý haty keldi. Endi konventsııaǵa qosylý úshin qajetti protsedýralardy qolǵa alamyz. Bul konventsııa shetelden korrýptsıonerler men urlanǵan aktıvterdi qaıtarý jolyndaǵy múmkindikterimizdi keńeıtedi», - dedi Antıkor basshysy.

Onyń paıymynşa, Eýropa keńesiniń Sybaılas jemqorlyqqa qarsy memleketter tobynyń múshesi bolý - elimiz úshin óte mańyzdy qadam.

«GREKO-nyń tolyqqandy qatysýshysy retinde alǵashqy monıtorıngtik raýndtar sheńberinde bizge berilgen 27 usynymyn oryndap jatyrmyz. Eýropa standarttaryna saı bolý úshin biz sot júıesiniń tolyqqandy táýelsizdigin, tıisti qoǵamdyq baqylaýdy qamtamasyz etýge, derekterge qoljetimdilikti keńeıte otyryp, sybaılas jemqorlyqqa qarsy organnyń mártebesin kúsheıtýge tıispiz. Bul baǵyttaǵy jumystar jalǵasyp jatyr», - dedi agenttik tóraǵasy.

Ashyq kózderden alynǵan fotosýret