Eýropa qazaqtary arasyndaǵy fýtbol oıynynda 13 komanda baq synady

PARIJ. QazAqparat - Parıj qalasynda shetelde turatyn otandastardyń qatysýymen ótken Eýropa qazaqtarynyń quryltaıynda fýtbol jarysy uıymdastyryldy, dep habarlaıdy QazAqparat.

Sharany ótkizýge QR Frantsııadaǵy elshiligi men Frantsııadaǵy qazaq-túrik qoǵamy, sonymen qatar «Otandastar qory» kommertsııalyq emes aktsıonerlik qoǵamy atsalysty.

Quryltaıdyń resmı ashylýy Eýropa elderi men Qazaqstannan kelgen komandalar arasyndaǵy fýtbol oıynymen bastaldy.

Toǵyz eldiń namysyn qorǵaǵan 13 komanda ózara myqtyny anyqtady.

Atap aıtqanda, Parıjden - 4, Berlınnen – 1, Kelnnan – 1, Mıýnhennen – 1, Venadan – 1, Túrkııadan – 1, Qazaqstannan – 3 jáne Gollandııadan – 1 komanda fýtbol alańynda bas qosty.

Ashylý saltanatynda Garges-Les-Gonesse qalasynyń meri Benoit Jimenez ben «Otandastar qory» KeAQ prezıdenti Abzal Saparbekuly sóz sóılep, ár qomandaǵa sáttilik tiledi.

Oıyn barysynda Qazaqstan elinen kelgen «Almaty» komandasy men «Parıj - 1» komandasy fınalǵa shyǵyp, doda sońynda Almaty komandasy jeńiske jetti.