Eýropa Qaıta Qurý jáne Damý Bankiniń Ortalyq Azııaǵa belsendiligi artyp otyr - B. Jámishev
ASTANA. 6 aqpan. QazAqparat - Búgin QR Parlamenti Májilisiniń jalpy otyrysynda «Eýropa Qaıta Qurý jáne Damý Bankin qurý týraly kelisimge alýshy elderde jáne áleýetti alýshy elderde arnaıy qorlardyń qarajatyn paıdalanýdy sanktsııalaıtyn túzetýdi ratıfıkatsııalaý týraly» zań jobasy maquldandy.
«Túzetýde Bankke múshe eldi Banktiń kómegin áleýetti alýshy elderdiń qataryna qabyldaý sharttary kózdelgen. Sonymen qatar, Bankte áleýetti alýshy elderdiń arnaıy qorlaryn paıdalaný múmkindigi beriledi. Budan buryn osy norma tek Banktiń resýrstaryn alýshy elderge ǵana qoldanylǵan bolatyn. Túzetýdi qabyldaý Qazaqstannan Banktiń jarǵylyq kapıtalyna qosymsha jarnalar engizýdi talap etpeıdi», - deıdi Qarjy mınıstri Bolat Jámishev. Mınıstrdiń sózine qaraǵanda, búgingi kúni Eýropa Qaıta Qurý jáne Damý Bankiniń quramynda 67 memleket kiredi. Onyń ishinde 30 memleket resýrstardy alýshy elderge jatady.
«Jalpy Ortalyq Azııa elderiniń barlyǵy da Eýropa Qaıta Qurý jáne Damý Bankiniń qatysýshylary bolyp tabylady jáne osy elder banktiń qarajattaryn belsendi tartýda. 2010 jyly EQQDB jalpy kelisimderiniń 11 paıyzy Ortalyq Azııa óńirine tıesili bolǵan edi. Bul soma 2012 jyly 5 paıyzdy qurady. Kórsetkishtiń tómendeýi negizinen kelisimder sanynyń artýymen (12 paıyzǵa artqan) jáne olardyń júzege asyrylýynyń kemýimen baılanysty bolyp otyr. Sondyqtan da, Bank Ortalyq Azııa óńirinde asa belsendi», - dedi B. Jámishev. Onyń aıtýyna qaraǵanda EQQDB búgingi kúni elimizdegi birqatar ekonomıkalyq mańyzdy jobalardyń júzege asýyna qatysýda.
