Eýropa qaıta qurý jáne damý bankiniń ókilderi KGF tikeleı ınvestıtsııalaý qorynyń qyzmetimen tanysty
ALMATY. Naýryzdyń 16-sy. QazAqparat /Erlik Erjanuly/ - Qazaqstanǵa issaparmen kelgen Eýropa qaıta qurý jáne damý bankiniń ókilderi uzaq merzimdik strategııalyq ınvestıtsııalyq yntymaqtastyq aıasynda KGF tikeleı ınvestıtsııalaý qorynyń qyzmetimen tanysty,
dep habarlaıdy QazAqparat.
«Qor korporatıvtik basqarý protsedýrasyn engizý jumystaryn aıaqtap, naqty jobalardy taldaýdy bastady. Biz endi jaqyn arada alǵashqy ınvestıtsııalaryn júzege asyratyna úmit artamyz. Qazaqstannyń naqty sektoryndaǵy kásiporyndar jeke qarajattan tapshylyq kórýde. Sol sebepti tikeleı qarjylandyrý sııaqty qural ornyqty kompanııalardy qurýdyń negizgi talaby bolý múmkin», deıdi qordyń Baqylaýshylar keńesiniń múshesi Kýrt Gaıger.
Qazirgi tańda qorjynynda 28 kompanııanyń jobalary qaralyp jatqan KGF tikeleı ınvestıtsııalaý qory óz qyzmetin 2009 jyldyń kúzinde bastaǵan bolatyn. Ol kompanııa aktsııalarynyń nemese úlesteriniń 25-ten 50 paıyzǵa deıingi kólemde ıelenýge daıyn. Mamandardyń aıtýynsha, qazir kompanııalardyń aktsıonerlik kapıtalyn ınvestıtsııalaýǵa eń utymty sát. Daǵdarysqa baılanysty kompanııalardy ınvestıtsııalyq baǵalaýǵa túzetýler engizildi. Bul olardyń aktsııalaryn nemese úlesin ıelenýge qatysýdy barynsha tartymdy etýde.
