Eýropa Qaıta Qurý jáne Damý Bankiniń Qazaqstandaǵy artyqshylyqtary naqtylandy - Parlament
ASTANA. 23 qańtar. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasy men Eýropa Qaıta Qurý jáne Damý Banki arasyndaǵy yntymaqtastyq pen Eýropa Qaıta Qurý jáne Damý Bankiniń Qazaqstan Respýblıkasyndaǵy qyzmetine qatysty kelisimdi ratıfıkatsııalaý týraly» zańyn qabyldady.
Kelisimge byltyrǵy jyldyń mamyr aıynda Ystambul qalasynda qol qoıylǵan. Kelisimde Banktiń Qazaqstan aýmaǵynda paıdalanatyn mártebesi, ımmýnıtetteri, artyqshylyqtary jáne alyp qoıýlaryn rastaý jáne aıqyndaý maqsatyn qarastyrady. Budan bólek, Kelisimniń negizgi baǵyttary ımmýnıtetterden bas tartý jáne Bankti qurý týraly oǵan deıin bar artyqshylyqtarǵa qosymsha artyqshylyqtar berý jaǵdaılaryn naqtylaıdy.
Atap aıtqanda, mundaı artyqshylyqtar men ımmýnıtetterge Bank muraǵattaryna jáne oǵan tıesili barlyq qujattarǵa nemese ornalasqan jerine, nysanyna qaramastan, ózi ustaýshy bolyp tabylatyn qujattarǵa qol suǵylmaýshylyq jatady. Kelisim boıynsha Bank óziniń resmı qyzmetiniń sheginde Qazaqstan aýmaǵynda sot isin júrgizýdiń kez kelgen nysanynan ımmýnıtetke ıe bolady.
QR Qarjy vıtse-mınıstri Rýslan Dálenovtiń aıtýynsha, Kelisim sharttaryna sáıkes, Bank pen onyń aktıvteri, múlki, tabysy, mámileleri, operatsııalary men paıdasy tikeleı salyq salýdan, kez kelgen alymdar men aýdarymdardan bosatylady. Budan bólek, Bank qyzmetkerleri zeınetaqymen qamsyzdandyrý jáne medıtsınalyq saqtandyrý júıesi salasyndaǵy, valıýtalyq shekteýlerden bosatý týraly artyqshylyqtardy da paıdalana alady. Degenmen, mundaı artyqshylyqtar Qazaqstan azamaty bolyp tabylatyn Bank qyzmetkerlerine qoldanylmaıdy. Toqtala ketetin jaıt, atalǵan kelisim boıynsha kórsetilgen artyqshylyqtar, ımmýnıtetter men jeńildikter negizinen jekelegen adamdardyń jeke bas paıdasy úshin emes, Banktiń múddesi úshin berilip otyr.
Parlament qabyldaǵan zań Memleket basshysynyń qol qoıýyna joldanady.
