Eýropa balalardy ınternettegi zorlyq-zombylyqtan qalaı qorǵamaq

Eýroodaq ınternette balalarǵa kórsetiletin seksýal zorlyqpen kúres týraly zań daıyndap jatyr. Al qupııalyq quqyǵyn qorǵaýshylar zańda jeke bas quqyǵyna qol suǵý bar dep dabyl qaqty, dep habarlaıdy QazAqparat Euronews agenttigine silteme jasap. 

Brıýsselde Eýroodaqtan balalarǵa kórsetiletin seksýal zorlyq týraly erejeni tezirek qabyldaýdy talap etken narazy top «Onlaın tazalyq jasańyzdar!» dep málimdedi.

Belsendiler qorǵanysh kostıýmin kıip, qolyna tazartý quraldaryn ustap alǵan. Olar osy arqyly ınternettiń balalar úshin las ári qaýipti oryn ekenin jetkizgisi keldi.

«Batyldyq qozǵalysy» uıymynyń músheleri jas kezde ózderi de osyndaı qastandyq qurbany bolǵan. Endi olar EO balalarǵa alymsaqtanatyn seksýal jaýyzdarǵa qarsy shara qoldanǵanyn qalaıdy.

Irlandııalyq belsendi Patrık Stenford ata-analarǵa úıdegi kompıýterdiń qandaı maqsatta paıdalanylyp jatqanyn baqylaýǵa shaqyrady:

«Bes balanyń bireýi, balalaryńyzdyń ár besinshisi 15 pen 16 jas aralyǵynda seksýal zorlyqqa ushyraıdy. Kóbi vırtýal álemde bolady. Ókinishke qaraı, álemde onlaın jasalatyn seksýal qastandyqtyń 60% Eýropada tirkelgen», - deıdi ol.  

Tekserý týraly zań iri tehnologııa platformalarynan balalarǵa seksýal zorlyq kórsetýge jatatyn materıaldardy izdep, tyıym salýdy talap etedi.

Degenmen chattardy baqylaý týraly zań jeke bas quqyn qorǵaýshylardyń narazylyǵyn týǵyzdy. EO-ǵa úkimettik emes uıymdar ashyq hat jazyp, qazirgi zań Eýropanyń júzdegen mıllıon turǵynynyń hatyn oqyp, qupııalyqtan aıyrýy múmkin ekenin eskertti.

EO-ǵa múshe elder bul máseleni qyrkúıektiń sońynda talqylaıdy. Eýrodepýtattar qazanda Іrgeli quqyq komıtetinde chattardy baqylaý týraly debat ótkizip, sodan keıin ınternette balalarǵa seksýal zorlyq jasaý máselesi Eýropa parlamentiniń plenarlyq sessııasynyń kún tártibine engiziledi.