Eýropa ǵaryshtaǵy qoqysty jınaıtyn apparat ushyrady
ASTANA. KAZINFORM — Eýropalyq ǵarysh agenttigi orbıtaǵa arnaıy apparat jiberip, jumysyn aıaqtaǵan spýtnıkterdi ustap, ǵaryshtan shyǵarýdy josparlap otyr. Bul tehnologııany ázirleýge 102 mıllıon eýrodan astam qarjy bólindi, dep habarlaıdy BILD.
Jobany Germanııanyń OHB kompanııasy jetekshilik etetin halyqaralyq konsortsıým ázirleıdi. ClearSpace-1 mıssııasyn 2030 jyly ushyrý josparlanǵan.
Apparattyń alǵashqy nysanasy 2001 jyly ushyrylǵan PROBA-1 spýtnıgi bolady. Ǵaryshtaǵy qoqysty jınaýǵa arnalǵan apparat oǵan ózdiginen jaqyndap, tórt robottandyrylǵan manıpýlıatory arqyly ustap alady. Sodan keıin eki apparatty da Jer atmosferasyna baǵyttaıdy. Atmosferaǵa engen kezde olar janyp ketýi tıis.
Mundaı tehnologııaǵa degen qajettilik orbıtadaǵy qoqys kóleminiń artýyna baılanysty kúsheıip keledi. Eýropalyq ǵarysh agenttiginiń málimetinshe, Jer orbıtasynda 47 myńnan astam nysan baqylanady. Al kólemi 1-10 santımetr bolatyn usaq synyqtardyń sany 1,5 mıllıonǵa jetýi múmkin.
Qozǵalys jyldamdyǵy joǵary bolǵandyqtan, tipti shaǵyn synyqtardyń ózi jumys istep turǵan spýtnıkterge zaqym keltiredi.
Eske salaıyq, buǵan deıin SpaceX kompanııasy Starship kemesin ǵaryshtan oralǵan soń alǵash ret mehanıkalyq manıpýlıatorlarmen ustap aldy.