Eýropa fýtbolyna jańa naryqtyń esigi ashylýy múmkin — Sol Kempbell Dastan Sátbaev jaıly
ALMATY. KAZINFORM — Digital Almaty forýmyna «Arsenal» klýbynyń jáne Anglııa quramasynyń burynǵy fýtbolshysy Sol Kempbell arnaıy keldi.
Fýtbol áleminiń ańyzy Almatyda ótip jatqan halyqaralyq forým aıasynda tehnologııa men sport taqyrybynda sóz qozǵaıtynyn atap ótti.
— Bul Almatyǵa meniń alǵash ret kelýim emes. Biraq osyndaı forýmǵa qatysý men úshin jańa tájirıbe. Búgin spıker retinde baıandama jasaımyn, al erteń startaptar baıqaýynda qazylar alqasyna qosylamyn. Jalpy forým aıasynda tehnologııany sportqa engizýdegi tájirıbemmen bólisemin, — dedi ol.
Sol Kempbell «Chelsıdiń» qazaqstandyq Dastan Sátbaevty, al «Manchester Sıtı» klýby ózbekstandyq Abdýqodır Hýsanovty satyp alýyna baılanysty pikir bildirdi.
— Aǵylshyn Premer-lıgasy Ortalyq Azııaǵa óńirine jaqyndaı tústi. Bul óńirdiń jankúıerlerine APL oıyndaryn tamashalaý burynǵydan da qyzyq bolady. Eger jaqynda aıtylǵan klýbtarǵa aýysqan oıynshylar kásibılik kórsetip, jattyǵyp, ary qaraı damyp, jaqsy kózge túsetin bolsa, Eýropaǵa jańa naryqtyń esigi ashylady, — dedi ol.
Sondaı-aq ol almatylyq «Qaırattyń» jattyǵý ortalyǵyna joǵary baǵa berdi.
— Birneshe jyl buryn «Qaırat» quramynda Arshavın oınaǵan kezde men Almatyda bolǵanmyn. Sonda «Qaırattyń» bazasynda boldym. Seriktestik týraly da sóıleskenbiz, alaıda bul oryndalmady. Biraq almatylyq klýbtyń bazasy sońǵy jyldary men kórgen úzdik jattyǵý oryndarynyń biri, — dedi Sol Kempbell.
Eske salaıyq, buǵan deıin tanymal ınsaıder qazaq oıynshysynyń «Chelsıǵa» aýysqanyn rastaǵanyn jazǵanbyz.