Eýropa elderiniń naryǵyna qazaqstandyq bıdaıdy shyǵarý tıimsiz - A. Mamytbekov
«Qazaqstannyń geografııalyq jaǵdaıy da, onyń tereńkontınentaldy ornalasý orny da astyq tasymalynyń, onyń baǵasynyń básekesine áser etpeı qoımaıdy. Máselen, Qazaqstannan bir tonna bıdaıdy Qara teńiz ben Baltyq teńiz jaǵalaýyna deıin tasymaldaýdaǵy kóliktik shyǵyn júz dollardan asady. Sondyqtan da, joǵary proteındi, organıkalyq astyqty qospaǵanda, Qara teńiz ben Baltyq teńizi porttary arqyly Eýropalyq elderdiń naryǵyna, Soltústik Afrıka, Taıaý Shyǵys elderine qazaqstandyq astyqty eksporttaý ekonomıkalyq turǵydan esh tıimsiz», - dedi Asyljan Mamytbekov.
Bul rette mınıstr joǵary kóliktik shyǵyndaryn bıýdjetten óteý ishki naryqtaǵy baǵanyń quldyraýyna ákep soǵatynyn atap ótti. Vedomstvo basshysynyń sózine qaraǵanda, osyndaı tájirıbeniń nátıjesinde 2009-2011 jyldary álemdik baǵa men Qazaqstannyń ishki naryǵyndaǵy baǵanyń aıyrmashylyǵy aıtarlyqtaı bolyp ketken. «Bunyń bári astyq óndirisiniń shyǵyndy bolýyna soqtyrdy, sharýalar joǵary deńgeıde egin alyp, sodan shyǵynǵa batyp jatty. Tipti, sharýalar ǵana emes, bıýdjetten de shyǵyn artty, máselen osyndaı jyldary qoımalar jetispeýshiliginen ishki tasymaldarǵa qomaqty qarajat shyǵyndaýǵa týra keldi», - dedi A. Mamytbekov.