Eýropa elderindegi balalardyń kópshiligi semizdikten zardap shegýde

ASTANA. QazAqparat - Eýropada 6–9 jas aralyǵyndaǵy balalardyń úshten birinde artyq salmaq nemese semizdik baıqalady. Mundaı derekti Dúnıejúzilik densaýlyq saqtaý uıymynyń óńirlik bıýrosy mamandary keltirdi, dep habarlaıdy QazAqparat BUU Jańalyqtar qyzmetine silteme jasap.

Buǵan óńirdegi 33 eldegi 2018–2020 jyldar aralyǵynda jınalǵan derekteri dálel.
Jalpy alǵanda, bastaýysh mektep jasyndaǵy 411 myńǵa jýyq bala týraly aqparat zertteldi. Esepte alǵash ret Armenııa, Germanııa jáne Izraıl – DDSU bastamasyna jaqynda qosylǵan elderdiń derekteri usynylǵan.
Aımaq boıynsha orta eseppen artyq salmaq, onyń ishinde semizdik balalardyń 29 paıyzynda tirkelgen. Alaıda, elder boıynsha kórsetkish aıyrmashylyǵy aıtarlyqtaı: Tájikstanda balalardyń tek 18 paıyzynda artyq salmaq baıqalsa, Kıprde – 43 paıyz. Sonymen qatar, salmaqtyń joǵarylaýy qyzdarǵa (28 paıyz) qaraǵanda uldarǵa (31 paıyzy) kóbirek tán.

«Zertteý nátıjesi kórsetkendeı, árbir úshinshi bala áli de artyq salmaqpen nemese semizdikpen ómir súrip jatyr. Bul sandy azaıtý úshin biz óz áreketterimizdi kúsheıtýimiz kerek», — dedi DDSU-nyń juqpaly emes aýrýlardyń aldyn alý jáne baqylaý jónindegi Eýropalyq basqarmasy basshysynyń ýaqytsha mindetin atqarýshy doktor Kremlın Vıkramasıngh.
Balalardaǵy artyq salmaqtyń negizgi sebepteriniń biri – qozǵalyssyz ómir salty, durys tamaqtanbaý jáne qantty shamadan tys tutyný. Zertteý kórsetkendeı, balalardyń barlyǵy derlik (87 paıyzy) kúnine keminde bir saǵat syrtta oınaıdy, kóbisi (43 paıyzy) kún saıyn jemis–jıdek jeıdi, al 34 paıyzy kókónis jeıdi, bul balalardyń dene salmaǵyn qalypty deńgeıde ustaý úshin jetkiliksiz bolyp otyr.

Ashyq kózderden alynǵan foto