Eýropa elderi týrısterdi qabyldaýǵa daıyndalyp jatyr
NUR-SULTAN. QazAqparat – Eýropa elderi týrısterdi qabyldaýǵa daıyndalyp jatyr, dep habarlaıdy QazAqparat Euronews agenttigine silteme jasap.
Máselen, Ispanııadaǵy epıdemıologııalyq jaǵdaı 8 maýsymnan keıin fýtboldan ulttyq chempıonatty bastap, al jazda sheteldik týrısterdi qabyldaýǵa múmkindik berip otyr. Bul týraly eldiń premer-mınıstri Pedro Sanches málim etken.
«La Lıga» basshylyǵy aldaǵy kúnderi naýryz aıynda pandemııa saldarynan toqtatylǵan jarys oıyndarynyń kestesin kelisýdi josparlap otyr. Úkimet basshysy osy arada týrıstik maýsymnyń ashylýyna qarsy meıramhanalar, qonaqúıler men jaǵajaılardy daıyndaýǵa shaqyrdy.
«Ispanııa jyl saıyn 80 mıllıonnan astam qonaqty qabyldaıdy. Shilde aıynan bastap sheteldik týrıster elge qaýipsiz jaǵdaıda kele alatynyn jarııalaımyn. Osy kezden bastap, sheteldik týrıster elimizde demalysyn josparlaı alady», - dedi ol.
Al Italııa Eýroodaq elderinen keletin týrısterdi resmı túrde 3 maýsymnan qabyldaýǵa ázir. Munda murajaılar jumysyn bastaýda. Beısenbi kúni – Kolızeı, odan keıin Florentsııadaǵy Ýffıtsı galereıasy ashylady. 1 maýsymnan bastap bıletterin brondaǵan kelýshiler Vatıkan murajaılaryn tamashalaı alady.
Grekııa eli de týrısterdiń aǵynyna daıyndyq ústinde. Endi, epıdemıologııalyq ahýaly jaqsy memleketterdiń týrısteri bul elge koronavırýsqa test tapsyrmaı jáne karantınge oqshaýlaýsyz kele alady.
Horvatııa úkimeti óz týrısteri úshin shekarany 15 maýsymnan keıin ashady.
Frantsııa bıligi ishki týrızmniń mańyzyn erekshe atap ótýde. Eldiń premer-mınıstri Edýar Fılıpp týrızm sektoryna qatysty josparlardy kelesi aptada usynýdy ýáde etti.
Germanııada da karantın sharalary bara-bara jumsaryp keledi. Kantsler Angela Merkel el azamattaryn asyqpaı ári erekshe saqtyqpen áreket etýge shaqyrdy.
Eýropada koronavırýs juqtyrýdyń 2 mıllıonnan astam oqıǵasy tirkelgen, 170 myńǵa jýyq adam qaıtys boldy.
Sońǵy málimetke sáıkes, álemde indetke shaldyqqandardyń jalpy sany 5,5 mıllıonǵa jýyqtady.
