Eýropa elderi qýańshylyqtan zardap shegip otyr

NUR-SULTAN. QazAqparat – Aptap ystyq pen qýańshylyqtan Eýropa elderiniń aýyl sharýashylyǵy men basqa da salalary zardap shegip otyr. Sýdyń tapshylyǵy fermerlerge ǵana emes, týrızm nysandaryna da qıyndyq týǵyzǵan. Sebebi, keıbir qonaqúıler sýsyz qaldy, dep habarlaıdy QazAqparat Euronews-ke silteme jasap.

Rýmynııadaǵy júgeri egistigi qýrap qalǵan. Jergilikti sharýalar ónimniń tórtten bir bóligin de ala almaýymyz múmkin dep alańdaýly.

Al, Italııadaǵy Po ózeni alqabynda kúrish egistigi qýrap jatyr. Ózenniń joǵarǵy jaǵynda sý jetispeıdi, al saǵasyna qaraı topyraq tuzdy bolyp ketken. Fermerler bıyl ádettegi eginniń úshten bir bóligi jınalsa degen úmitte.

Frantsııa 1961 jyldan beri bolmaǵan qýańshylyqqa tap boldy. Jaýyn-shashyn mólsheri keıingi 30 jyldaǵy ortasha normadan 84 paıyzǵa tómendep ketken. Bul elde qazir týrıstik maýsymnyń qyzǵan shaǵy. Al, Vogezy taýly aımaǵyndaǵy Jerarme qalasyna myńdaǵan saıahatshylardy tartatyn ózen tamyzdaǵy úırenshikti mólsherden 15-20 sm taıazdanǵan. Munda aýyz sýmen jabdyqtaý toqtatylyp, bul jergilikti qonaqúıler men qoǵamdyq tamaqtaný oryndaryna qıynǵa soǵyp otyr.