Eýropa elderi koronavırýsqa qarsy jańa shekteý sharalaryn engizip jatyr
LION. EURONEWS – QazAqparat – Eýropa elderi koronavırýs ınfektsııasynyń taralý qarqynyn tejeýge tyrysýda, dep habarlaıdy QazAqparat Euronews-ke silteme jasap.
Jańa sanıtarlyq shekteýler Frantsııada kúshine endi. Kem degende eki aptaǵa Parıjde jáne basqa da iri qalalarda barlar jabylady. Meıramhanalar qatań sanıtarlyq hattama aıasynda jumys isteıdi. El úkimeti kásiporyndarǵa múmkindiginshe qashyqtan jumys isteýge keńes berip otyr.
Italııa bıligi de kúsheıtilgen talaptardy qarastyrýda. Densaýlyq saqtaý mınıstri Roberto Sperantsa búkil el boıynsha ashyq aýada qorǵanysh maskasyn taǵý talabyn mindetti etip engizdi. Bul ereje sońǵy kúnderi koronavırýs juqtyrý jaǵdaılarynyń sany kúrt artqan aımaqtarda, onyń ishinde Kampanııanyń ońtústiginde qoldanylady. «Búgin, 6 qazandaǵy jaǵdaı boıynsha Italııada 59 myń adam koronavırýsqa shaldyqqan. Eki aı buryn bul kórsetkish 12600 bolǵan edi. Eki aı ishinde aýrý juqtyrǵandar sany kúrt artyp ketti. Muny baıqamaý múmkin emes», - dedi vedomstvo basshysy.
Latsıo oblysynda bılik balalar úshin koronavırýsqa qarsy testileý protsedýrasyn jeńildetýge tyrysýda, dárigerler taldama úshin balalardyń silekeıin alady.
Ispanııanyń ulttyq sot alqasy Madrıd avtonomdy qaýymdastyǵynda pandemııany boldyrmaý úshin engizilgen shekteý sharalaryn toqtata turýdan bas tartty. Sotqa «Voks» partııasy ótinish bildirgen. Karantın jeńildegennen keıin Ispanııada koronavırýstyń taralý qarqyny tez ósýde. Elde ekonomıkalyq ahýal nasharlady, jyl qorytyndysy boıynsha Ispanııanyń JІÓ 11%-dan astam qysqarýy múmkin.
