Eýropa elderi Qazaqstanǵa sapasyz sút pen maı jetkizýde
Qoǵamdyq densaýlyqty saqtaý komıtetiniń tóraǵasy - Bas memlekettik sanıtarlyq dáriger Jandarbek Bekshınniń aıtýynsha, búginde árbir besinshi sút óniminde buzýshylyqtar anyqtalyp otyr. Atap aıtqanda, qaptamada kórsetilgen málimetter ónimniń quramyna sáıkes kelmeıdi. Osylaısha, óndirýshiler xalyqty aldap, óz taýarlaryn satyp otyrady. "Sonyń ishinde sary maı, ishetin jáne qoıýlatylǵan sút, jumsaq irimshikter men balalarǵa arnalǵan ıogýrttar bar. Atalǵan ónimderge tabıǵı sút maıy emes, palma, jerjańǵaq sııaqty ósimdik maılary qosylady", - dedi J.Bekshın Astanada ótken baspasóz máslıxatynda.
Bas sanıtarlyq dáriger atap ótkendeı, saraptama kezinde 79 synama alyndy. Sonyń 23 protsenti, ıaǵnı 18 synamasy talapqa saı emes bolyp shyqty. J.Bekshın tártipti buzǵan sheteldik kompanııalar men olardyń ónimderin de atady.
"Frantsııanyń "Laktalıs Interneshnl" fırmasy shyǵaratyn "President" sary maıy (82%), Fınlıandııanyń "Valıo" fırmasynyń ýltrapasterlengen súti, Germanııanyń "Omıra Oberland" fırmasy shyǵaratyn laktozasyz "Mınýs L" súti, Lıtvanyń "Svalıa"-sy óndirgen sary maı, Reseıdiń "Moltorg" AAQ shyǵaratyn "Pestravka" qaımaǵy, sosyn maılylyǵy 3,2% "Domık v derevne" súti bar. Ony Qyrǵyzstannyń "Bishkeksút" zaýyty shyǵaryp otyrady", - dep atap kórsetti J.Bekshın.
Aıta keteıik, búgingi baspasóz máslıxatynda komıtet tóraǵasy sheteldiń taýyq etinen salmonella men ishek taıaqshalary tabylǵanyn málimdedi.
Foto: krsk.sibnovosti.ru