Eýropa elderi BUU Halyqaralyq sotyna qoldaý bildirdi
ASTANA. KAZINFORM – Eýropa elderi AQSh ákimshiliginiń Halyqaralyq qylmystyq sottyń (HQS) apellıatsııalyq palatasynyń tórt sýdıasyna jańa sanktsııalar engizý týraly sheshimine baılanysty Halyqaralyq sotqa qoldaý bildirdi.
Bul palata Izraıl premer-mınıstri Bınıamın Netanıahý men burynǵy qorǵanys mınıstri Ioav Gallantqa shyǵarylǵan qamaýǵa alý orderleri boıynsha apellıatsııalardy qarastyrýda.
Eýropanyń kóptegen eli Vashıngton ákimshiliginiń sanktsııalyq sheshimine qatysty málimdeme jasady.
Eýropa odaǵy (EO) komıssııasynyń tóraıymy Ýrsýla fon der Lıaıen X áleýmettik jelisinde:
— Komıssııa Halyqaralyq qylmystyq sotty jáne onyń laýazymdy tulǵalaryn tolyǵymen qoldaıdy, — dep jazdy.
Onyń aıtýynsha, HQS álemdegi eń aýyr qylmys jasaǵan adamdardy jaýapqa tartady. Ýrsýla fon der Lıaıen Sottyń eshqandaı qysymsyz erkin jumys isteýi qajet ekenin atap ótti.
Saıasatker halyqaralyq ádilettilik pen halyqaralyq quqyqty qurmetteýdi árdaıym qoldaıtynyn aıtty.
Nıderlandy
Nıderland syrtqy ister mınıstri Kaspar Veldkamp Nıderland Halyqaralyq qylmystyq sottyń laýazymdy tulǵalaryna qarsy jańa sanktsııalardy quptamaıtynyn atap ótti. Táýelsiz halyqaralyq sot óz jumysyn esh kedergisiz atqarýy tıis. Biz Sotty nyq qoldaımyz.
— 125 múshe memlekettiń biri jáne Sotty qabyldaýshy el retinde biz onyń barynsha kedergisiz jumys isteýin qamtamasyz etýge tolyq beıildimiz, — dedi Veldkamp.
Slovenııa AQSh-tyń HQS sýdıalaryna sanktsııa salý týraly sheshimin qatań aıyptady.
— Men AQSh-tyń Halyqaralyq qylmystyq sot sýdıalaryna, sonyń ishinde slovenııalyq sýdıa Betı Holerge sanktsııa salý týraly sheshimin qatań aıyptaımyn. Bul óte alańdatarlyq ári qabyldaýǵa bolmaıtyn qadam, — dedi Slovenııa prezıdenti Natasha Pırts Mýsar.
Ol ádilet pen zań ústemdigine qyzmet etetinderge eshbir el qoqan-loqy jasamaýy nemese jaza qoldanbaýy tıis ekenin basa aıtty.
Mýsar HQS — adamzatqa qarsy asa aýyr qylmystardy qýdalaý úshin halyqaralyq qaýymdastyq qurǵan táýelsiz sot organy ekenin atap ótip, bul sottyń sýdıalaryna kúmán keltirý esep berý men ádilet ıdeıasyna «shabýyl» dedi.
Prezıdent Slovenııa HQS-tyń táýelsizdigin qorǵaýdy jalǵastyratynyn málimdedi.
— AQSh sheshimi halyqaralyq quqyqtyń kúıreýi emes. Kerisinshe, bul ony qorǵaýymyz qajettigin kúsheıtedi, óıtkeni halyqaralyq quqyqty qurmetteý — Slovenııa syrtqy saıasatynyń ózegi. Slovenııa AQSh úkimetiniń HQS-tyń tórt sýdıasyna, sonyń ishinde slovenııalyq sýdıaǵa qatysty jarııalaǵan sanktsııalaryna ókinish bildiredi, — delingen Slovenııa Syrtqy ister mınıstrliginiń málimdemesinde.
— Slovenııa sot mekemelerine qysym men sot jumysyna aralasýdy qabyldamaıdy, al sottar zań men ádilet múddesinde áreket etýi tıis. Biz qazirgi ýaqytta azamatymyz bolatyn sýdıanyń óz mindetterin atqarýyn qoldaımyz. EO-ǵa múshe eldiń bir azamaty sanktsııalyq tizimge engenine baılanysty Slovenııa sanktsııalarǵa jol bermeıtin zańnama qabyldaýdy dereý usynady».
Aýstrııa
Aýstrııa Syrtqy ister mınıstrligi X áleýmettik jelisinde jarııalaǵan málimdemesinde, AQSh-tyń HQS-tyń tórt sýdıasyna sanktsııa salý sheshimi tereń ókinish týdyratynyn jetkizdi.
— Halyqaralyq qylmystar úshin jazasyzdyqty boldyrmaý baǵytynda jumys isteıtin Halyqaralyq qylmystyq sottyń qyzmetine kedergi keltirilmeýi tıis, — delingen málimdemede.
Fınlıandııa
Fınlıandııa Syrtqy ister mınıstrliginiń málimdemesinde, AQSh-tyń sanktsııa týraly sheshimi úlken alańdaýshylyq týdyratyny aıtyldy.
Helsınkıde HQS óz mıssııasyn qoryqpaı oryndaýy tıis ekeni jáne sot júıesi men aıyptaýdyń táýelsizdigi mańyzdy ekeni atap ótildi.
AQSh memlekettik hatshysy Marko Rýbıo HQS-tyń tórt sýdıasy AQSh pen Izraıldiń egemendigin buzdy degen jeleýmen sanktsııalyq tizimge engizilgenin habarlady.