Eýropa elderi balalarǵa áleýmettik jelilerdi qoldanýǵa jas shekteýin kúsheıtti
ASTANA. KAZINFORM — Eýropa elderi 15 jasqa deıingi balalarǵa áleýmettik jelilerdi qoldanýǵa tyıym salyp jatyr, Brıýssel jasyn tekseretin qosymshany tanystyrdy, dep habarlaıdy Euronews.
Eýropalyq Odaq elderinde birqatar ulttyq shekteý engizilýine baılanysty ınternetti paıdalanýda balalar úshin ortaq jas shekteýin engizý máselesi kúsheıip keledi. Eýrokomıssııa ókilderiniń aıtýynsha, qajetti tehnologııalar qazirdiń ózinde daıyn.
Eýropa boıynsha úkimet 15 jasqa tolmaǵan balalardyń áleýmettik jelilerge kirýin shekteýge asyǵyp otyr. Frantsııa bul tyıymdy resmı túrde maquldady. Danııada tıisti saıası kelisimge qol jetkizildi. Ispanııa budan da qatań nusqany qarastyryp jatyr — jas shegin 16 jasqa deıin kóterý. Al 2027 jyldan bastap óz tyıymyn engizýdi josparlap otyrǵan Grekııa Brıýsselge qysym jasap, búkil EO aýmaǵynda ortaq ereje qabyldaýdy talap etip otyr.
Bul qysym óz nátıjesin berip te jatyr. 15 sáýirde Eýrokomıssııa tóraıymy Ýrsýla fon der Lıaıen platformalarǵa ınternette balalardy qorǵaý sharalarynyń jetkiliksizdigine baılanysty «endi eshqandaı syltaý joq» ekenin málimdedi. Ol Eýropada jasyn tekserýge arnalǵan qosymsha tehnıkalyq turǵydan iske qosýǵa daıyn ekenin habarlady.
Qosymsha paıdalanýshynyń jasyn resmı qujattar nemese tsıfrlyq sáıkestendirý júıeleri arqyly rastaýdy talap etedi. Keıin ol «nóldik ashyp kórsetý dálelderi» tehnologııasyn paıdalanyp, paıdalanýshynyń naqty derekterin ashpaı-aq, onyń jasyn rastaıtyn belgi beredi.
Qosymsha ashyq kodpen jasalǵan jáne ulttyq tsıfrlyq júıelerge biriktirilýge beıimdelgen. Ol TikTok, Instagram, Facebook jáne Snapchat sııaqty platformalarǵa qoldanýǵa jaramdy.
Atalǵan tórt platforma kámeletke tolmaǵandardy jetkilikti deńgeıde qorǵamady degen kúdikpen EO tarapynan tergeýge alynǵan. Eýrokomıssııanyń balalar qaýipsizdigine jaýapty toby osy jazda óz sheshimin jarııalaıdy.
Tehnologııa daıyn, saıası erik bar. Eýropaǵa tek ulttyq normalardyń ártúrliligin úılestirip, biryńǵaı júıege keltirý qajet bolyp otyr.
Aıta ketelik Túrkııada balalardyń áleýmettik jeli men smartfon paıdalanýyna shekteý engiziledi.
