Eýropa elderi AQSh úshin áýe keńistigin japty

ASTANA. KAZINFORM — Italııa, Ispanııa jáne Avstrııa AQSh-qa áskerı qoldaý kórsetýden bas tartyp, Iranǵa qarsy operatsııada ózderiniń áýe keńistigi men ınfraqurylymyn paıdalanýǵa shekteý qoıdy.

Avstrııa bıligi beıtarap saıasatty ustanatynyn aıtyp, óz áýe keńistigin paıdalanýǵa suranymdy qabyldamady.

Vıtse-kantsler Andreas Bablerdiń aıtýynsha, eldiń qaqtyǵysqa qatysýǵa nıeti joq jáne yqtımal energetıkalyq daǵdarystyń saldaryn boldyrmaýǵa tyrysady. Onyń aıtýynsha, Avstrııa shıelenisti kúsheıtetin baǵytty qoldamaıdy.

Sondaı-aq Italııada AQSh-qa óz áskerı ınfraqurylymyn paıdalanýǵa ruqsat bermedi. Bul Sıtsılııa aralynda ornalasqan Sıgonella bazasyna qatysty.

Buqaralyq aqparat quraldarynyń habarlaýynsha, amerıkalyq áskerı ushaqtar áýede ushyp júrip qonýǵa suraý salǵan, biraq ıtalııalyq tarap aldyn ala kelisimniń bolmaýyna baılanysty ruqsat bermedi.

Sheshimdi Italııanyń Qorǵanys mınıstri qabyldady. Rımmen qajetti konsýltatsııalar aldyn-ala júrgizilmegeni atap ótilip, bul suranystan bas tartyldy.

Osyǵan deıin Ispanııa Iranǵa qarsy amerıkalyq ushaqtar úshin áýe keńistigin japqan bolatyn. El premer-mınıstri Pedro Sanches soǵys bastalǵaly beri AQSh pen Izraıldiń soqqylaryn zańsyz dep atap, Madrıdtiń bul qaqtyǵysqa qatyspaıtynyn birneshe ret málimdegen.