Eýropa elderi AQSh-qa járdemdespese, NATO-nyń bolashaǵy bulyńǵyr — Tramp
ASTANA. KAZINFORM — AQSh prezıdenti Eýropa elderin is júzinde Vashıngtonnyń Irandaǵy áskerı áreketterine qosylýǵa shaqyrdy, dep habarlaıdy DW aqparat agenttigi.
AQSh prezıdenti Donald Tramp eger Vashıngtonnyń odaqtastary Ormýz buǵazyn ashýǵa kómektespese, NATO-nyń bolashaǵy «óte bulyńǵyr» bolatynyn eskertti. Aq úı basshysy bul týraly jeksenbi kúni The Financial Times (FT) basylymyna bergen suhbatynda málimdedi.
Tramp osylaısha Eýropa elderin is júzinde AQSh-tyń Irandaǵy áskerı áreketterine qosylýǵa shaqyrdy, dep atap ótti FT. «Eger jaýap bolmasa nemese jaýap teris bolsa, meniń oıymsha, bul NATO-nyń bolashaǵy úshin óte jaman bolady», — dep málimdedi Tramp.
— Biz tym meıirimdi boldyq. Biz olarǵa Ýkraına máselesinde kómektesýimiz mindetti emes edi. Ýkraına bizden myńdaǵan shaqyrym qashyqtyqta… Biraq biz olarǵa kómektestik. Endi olar bizge kómektese me eken, kóremiz. Óıtkeni men uzaq ýaqyt boıy biz olardyń janynan tabylatynymyzdy, al olar biz úshin bolyspaıtynyn burynnan aıtyp kelemin. Men olardyń janymyzda bolatynyna senimdi emespin, — dedi Tramp.
Odaqtastar mına tazalaǵyshtardy jiberýi kerek, olardyń sany Eýropada AQSh-qa qaraǵanda áldeqaıda kóp, dep qosty prezıdent.
Tramp sonymen qatar eýropalyq arnaıy jasaq komandalary nemese basqa áskerı kúshterdiń Parsy shyǵanaǵynda drondar men áskerı-teńiz mınalary kómegimen «máseleler» týdyratyn Iran kúshterin joıýǵa kómekteskenin qalaıdy.
Osyǵan deıin AQSh prezıdenti Iranǵa qarsy soqqylardyń qarqynyn kúsheıtetinin eskertti.
