Eýropa durys baǵytta emes: Tramp Davosta ótken forýmda sóz sóıledi

ASTANA. KAZINFORM – AQSh prezıdenti Donald Tramp Air Force One ushaǵy tehnıkalyq aqaýǵa baılanysty keri burylyp, sapary keshigýi múmkin degen boljamǵa qaramastan, Davosqa ýaqytynda jetip, forýmda sóz sóıledi, dep habarlaıdy VVS.

AQSh prezıdenti sózin aldyńǵy ákimshilikti synǵa alýdan bastady. Onyń aıtýynsha, demokrattar AQSh-ty ekonomıkalyq turǵyda da, halyqaralyq arenada da edáýir álsiretken. Alaıda Tramp pen onyń komandasy bul jaǵdaıdy túzete alǵanyn málimdedi.

Sonymen qatar Donald Tramp Eýropa qurlyǵynyń damý jolyn qate tańdaǵanyn aıtty.

«Men Eýropany jaqsy kóremin, onyń gúldengenin qalaımyn. Biraq ol durys baǵytta damyp jatqan joq», – dedi Tramp.

Ol qazirgi kúıindegi Eýropany «moıyndamaıtynyn» aıtyp, baqylaýsyz jappaı kóshi-qondy, bıýdjet pen saýda balansynyń tapshylyǵyn, sondaı-aq eýropalyq kóshbasshylardyń áreketsizdigin synǵa aldy.

Grenlandııa máselesine qatysty Tramp AQSh qajetti nátıjege jetý úshin kúsh qoldanýǵa nıetti emes ekenin, alaıda araldy satyp alý jóninde dereý kelissóz bastaýdy talap etetinin aıtty.

Ol Grenlandııany ulttyq qaýipsizdik úshin ómirlik mańyzy bar aýmaq dep atap, bul terrıtorııany qorǵaý men damytýǵa tek AQSh qana qaýqarly ekenin jetkizdi. Sonymen birge amerıkalyq áskerı qatysýdyń kúsheıýi múmkin ekenin de joqqa shyǵarmady.

Sondaı-aq Tramp Venesýela aldaǵy alty aıda sońǵy 20 jylda tapqan tabysynan da kóp qarjy tabýy múmkin ekenin málimdedi.

Ol sózinde AQSh-tyń saýdasy men ekonomıkasyna erekshe nazar aýdarǵan Tramp sońǵy bir jylda eldiń aı saıynǵy saýda tapshylyǵy ınflıatsııasyz 77 paıyzǵa qysqarǵanyn aıtty. Onyń aıtýynsha, AQSh-ta jańa bolat zaýyttary salynyp jatyr. Sonymen qatar ol jalpy saýda kóleminiń 40 paıyzyn qamtıtyn jańa saýda kelisimderi jasalǵanyn, onyń ishinde Eýropa, Japonııa jáne Ońtústik Koreıamen, ásirese munaı-gaz salasyndaǵy kelisimder bar ekenin atap ótti.

Buǵan deıin Donald Tramptyń Davosqa rekordtyq delegatsııamen keletini habarlanǵan bolatyn.