Eýropa damý banki Qazaqstannyń jobalary boıynsha shuǵyl sheshim jasaı alady

ASTANA. KAZINFORM – Búgin Parlament Májilisiniń jalpy otyrysynda «Eýropa Qaıta Qurý jáne Damý Bankin qurý týraly kelisimniń 12-babynyń 1-tarmaǵyna ádettegi operatsııalarǵa jarǵylyq kapıtaldyq shekteýdi joıý maqsatynda túzetýlerdi ratıfıkatsııalaý týraly» Zańy qabyldandy.

«Qazirgi kezde bank kapıtalynyń jetkiliktilik normatıvteri men tıisti deńgeılerin qabyldaý boıynsha sheshimdi banktiń basqarýshylar keńesi bekitedi. Bul qarjylandyrý máselesi boıynsha sheshimderdi kelisý men qabyldaý rásimderin keshiktiredi. Osyǵan oraı bank shuǵyl sheshimder qabyldaý maqsatynda dırektorlar keńesine tıisti quzyrettilik berý máselesin kóterdi. Dırektorlar keńesi eldik toptardyń atynan usynylatyn 23 múshe memleketten turady. Tıisti túzetýler banktiń basqarýshylar keńesiniń 2023 jylǵy 18 mamyrdaǵy №260 qaýlysymen qabyldandy. Bul turǵyda usynylyp otyrǵan túzetýlerdi qabyldaý atalǵan bankke Qazaqstannyń ekonomıkalyq mańyzdy jobalaryn qarjylandyrý máselesin shuǵyl sheshýge múmkindik beredi», - dedi QR Qarjy mınıstri Mádı Takıev.

Onyń aıtýynsha, osy kelisimdi ratıfıkatsııalaý elimiz úshin teris áleýmettik-ekonomıkalyq, quqyqtyq saldarǵa ákelip soqpaıdy, sondaı-aq respýblıkalyq bıýdjetten qarajat bólýdi talap etpeıdi», - dedi mınıstr.

Budan buryn habarlanǵandaı, Parlament Májilisi Eýropa damý bankine qatysty taǵy bir qujatty qabyldady. 

Osy zań aıasynda atalǵan bank Saharanyń ońtústigine qaraı ornalasqan Afrıka elderi men Irak memleketinde bank operatsııalaryn keńeıtý týraly bastamasyn kóterip otyr.

M. Takıev Qazaqstan Eýropa Qaıta Qurý jáne Damý Bankiniń teń quryltaıshysy bolǵandyqtan, elimizdiń osy qarjy uıymyndaǵy úlesi bar ekenin atap ótti.

«Elimiz osy banktiń aktsıoneri sanalady. Sondyqtan bul kelisimdi ratıfıkatsııalaý arqyly biz olardyń qyzmetin ary qaraı keńeıtýge múmkindik beremiz. Bizdiń úlesimiz 0,23 paıyzdy qurap otyr», - dep túsindirdi vedomstvo basshysy.