Eýropa chempıonatynda fýtbolshynyń esinen tanýy: Danııa men Fınlıandııa matchty jalǵastyrdy
NUR-SULTAN. QazAqparat - Fýtboldan Eýropa chempıonatynyń fınaldyq satysyndaǵy Danııa men Fınlıandııa matchy qaıta jalǵasty, dep habarlaıdy QazAqparat tilshisi.
Atalǵan kezdesýdiń 42-mınýtynda danııalyq fýtbolshy Krıstıan Erıksen oıyn ústinde esinen tanyp qalyp, match ýaqytsha toqtatylǵan bolatyn.
Krıstıan Erıksen 1992 jyldyń 14 aqpanynda Danııanyń Mıddelfart qalasynda dúnıege kelgen. Kásibı fýtboldaǵy alǵashqy qadamyn 2010 jyly Nıderlandynyń «Aıaks» komandasynda bastaǵan. Odan keıin 2013-2020 jyldar aralyǵynda Anglııanyń «Tottenhem Hotspýrs» komandasynyń namysyn qorǵap, ótken jyly Italııanyń «Internatsıonale» klýbyna aýysty. Óz eliniń ulttyq quramasynda 2010 jyldan beri 109 oıyn ótkizip, qarsylastar qaqpasyna 36 gol soqqan.
K.Erıksenge dárigerler jasyl alań ústinde alǵashqy medıtsınalyq kómek kórsetti. Sodan keıin ony arnaıy tehnıkamen stadıon ishine alyp ketti. Dárigerlerdiń aıtýynsha, ol jergilikti aýrýhanaǵa jetkizilip, jaǵdaıy qalypqa túsken.
Match toqtatylǵan ýaqytynan bastap qaıta jalǵasty.
Eske salsaq, Fýtboldan Eýropa chempıonaty 11 maýsym kúni bastaldy. Ol 11 shildege deıin jalǵasatyn bolady.
