Eýropa chempıonaty: «Habar» arnasy fýtzaldan Qazaqstan-Reseı matchyn kórsetedi
ASTANA. QazAqparat - Búgin fýtzaldan 2018 jylǵy Eýropa chempıonaty toptyq kezeńiniń qorytyndy matchtary ótedi. Brazılııalyq bapker Kakaý bastaǵan Qazaqstan quramasy Reseımen kezdesedi, dep habarlaıdy «SPORTINFORM» SAA.
Eske sala keteıik, fýtzaldan bıylǵy Eýropa chempıonaty Slovenııa astanasy Lıýblıana qalasynda ótip jatyr. Onda Qazaqstan quramasy Polsha jáne Reseımen birge «V» tobyna túsken.
Toptyń alǵashqy kezdesýinde qazaqstandyq jigitter polshalyqtardy 5:1 esebimen talqandady. Sol oıynda goldardy Taınan, Orazov, Jamanqulov, Pershın jáne Dýglas bir-bireýden óz esebine jazyp qoıǵan bolatyn. Al reseılik ujym Polshamen 1:1 esebin tirkedi. Osy teń oıyn bizdiń quramaǵa týrnırdiń shırek fınalyna shyǵýyna jol ashty. Degenmen, Kakaý shákirtteri topty birinshi orynmen qorytyndylaý úshin Reseıdi de jeńýge bel býyp otyr.
Óıtkeni jartylaı fınalda «V» tobynyń úzdigi 1/4 fınaldaǵy «A» tobynyń ekinshi komandasymen shyqpaq. Bul topta pleı-off joldamasyna Slovenııa, Italııa jáne Serbııa quramalary qyzý talasyp jatyr. Atap aıtqanda, Slovenııa serbııalyqtarmen 2:2 esebin tirkedi. Serbııany, tipti ıtalııalyq ujym da jeńe almady - 1:1.
«Habar» arnasynda Qazaqstan-Reseı matchynyń tikeleı translıatsııasy Astana ýaqytymen 23:00-de bastalady.
