Eýropa chempıonaty: Qazaqstan quramasy búgin sheshýshi oıyn ótkizedi

ASTANA. KAZINFORM - Búgin, 12 naýryzda fýtzaldan 2026 jylǵy Eýropa chempıonatyna irikteý kezeńindegi altynshy týrda Qazaqstan jáne Armenııa kezdesedi.

Atalǵan oıyn 12 naýryzda elorda ýaqytymen saǵat 19:50-de bastalyp, «Qazsport» telearnasynan tikeleı efırde kórsetiledi.

Eki qurama altynshy topta synǵa túsip jatyr. Qazir týrnır kestesinde bes týrdan keıin 13 upaımen Armenııa birinshi orynda tur. Al Qazaqstannyń enshisine 10 upaı jazylǵan.

Bul kezdesýde jeńimpaz bolǵan qurama qurlyqtyq dodanyń fınaldyq satysyna tikeleı joldama alady.

2026 jyly Latvııa men Lıtva elderinde ótetin Eýropa chempıonatynyń fınaldyq kezeńine tikeleı joldama alý úshin Qazaqstan quramasyna Armenııamen kezdesýde úsh upaı aýadaı qajet. Toptyq kezeńde ekinshi oryn alǵan qurama 2025 jyldyń qyrkúıek aıynda ótetin ótpeli oıyndary arqyly joldamaǵa talasady.

Aıta ketsek, qazirge deıin Qazaqstan quramasy irikteý kezeńinde bes oıyn ótkizdi.

Aldymen Albanııany 2:0 esebimen jeńse, odan keıin Armenııamen 4:4 esebimen teń oınady.

Úshinshi kezdesýinde Danııadan 2:3 esebimen jeńilip qalsa, óz alańynda atalǵan qarsylasyn 7:3 esebimen tize búktirgen edi. Besinshi oıynda Albanııadan 4:2 esebimen basym tústi.

Ulttyq quramanyń bas bapkeri Paýlo Rıkardo Kaka atalǵan kezdesýde tómendegi oıynshylarǵa senim artyp otyr.

Qaqpashylar: Raýan Atantaev («Semeı»), Narýn Serikov («Qaırat»), Raýan Sısenǵalıev («Aıat»);

Alańdaǵy oıynshylar: Birjan Orazov, Dáýren Tursaǵulov, Arnold Knaýb, Jahangir Rashıt, Damır Qaıyrbaı (bári – «Qaırat»), Shyńǵys Esenamanov, Aqjol Dáribaı, Erjan Karmenov (bári – «Semeı»), Leo Mendonka (RFSh, Latvııa), Azat Valıýllın («Aıat»), Ashat Kólbaev («Aqtóbe»), Nursultan Pııaly («Ordabasy»), Aleksandr Derıabın («Tıýmen», Reseı).

Armenııada olardyń qataryna Dýglas Jýnıor qosyldy.

Al Leo Igıta jaraqatyna baılanysty bul oıynǵa qatysa almaıdy.