Eýropa chempıonaty: fýtboldan Qazaqstan jastar quramasy Anglııadan jeńildi

ASTANA. KAZINFORM - Búgin Qazaqstan 21 jasqa deıingi quramasy Eýropa chempıonatynyń irikteý kezeńi aıasynda Aqtóbede Anglııa quramasyna ese jiberdi.

Kezdesý barysynda anglııalyq fýtbolshylar basymdyq tanytty. Oıynnyń 18-mınýtynda olardyń qatarynan Etan Nvanerı esep ashsa, 23-mınýtta Djob Bellıngem kózdegen nysanasyn múlt jibergen joq.

Osylaısha otandastarymyz qarsylasynan 0:2 esebimen jeńilip qaldy.

Aıta keteıik, Qazaqstan jastar quramasy D tobynda Anglııa, Irlandııa, Slovakııa, Moldova jáne Andorra quramalarymen oınaıdy.

Olar 5 maýsym kúni Astanada Andorradan 1:0 esebimen basym tústi.

Endi qazaqstandyq jastar 9 qazanda 2027 jylǵy Eýropa chempıonaty irikteý kezeńi aıasynda syrt alańda Andorramen oınaıdy.

Qurlyqtyq dodanyń irikteý kezeńi 2026 jyldyń 6 qazanynda máresine jetedi.

Eske salsaq, budan buryn fýtboldan áıelder lıgasynda «Aqtóbe» «Oqjetpesti» taǵy da iri eseppen jeńdi.