Eýropa basshylary Pýtınniń kelissózder týraly usynysyna qalaı jaýap berdi
ASTANA. KAZINFORM — Jeksenbi kúni Ýkraınamen odaqtas eýropalyq elder derlik birdeı málimdeme jasap, bitim talaptaryn ustanatyndaryn atap ótti, dep habarlaıdy BBC.
Frantsııa prezıdenti Emmanýel Makron Reseı prezıdentiniń usynysyn «alǵashqy qadam, biraq jetkiliksiz» dep atady.
— Bitim jaıly kelissózderge deıin sózsiz atysty toqtatý bolmaıdy. Pýtın jol izdep otyr, biraq ýaqyt utqysy keledi, — dedi Makron Kıevten qaıtyp kele jatyp, Pshemysl qalasynda jýrnalısterge.
Jeksenbi kúni tańerteń Makron óziniń H jelisindegi jazbasynda kelissózder uryspen qatar júre almaıtynyn aıtty.
— Kıevte jáne prezıdent Tramppen birge biz naqty usynys jasadyq: dúısenbiden bastap eshqandaı shartsyz 30 kúndik bitim. Prezıdent Zelenskıı buǵan kelisti jáne eshqandaı talap qoıǵan joq. Qazir biz Reseıden dál sondaı aıqyn jaýap kútemiz. Zeńbirekter atylyp jatqanda kelissóz bolmaıdy. Azamattyq halyqqa bomba túsip jatqanda kelissóz múmkin emes. Kelissóz bastalýy úshin bitim qazir kerek, — dep jazdy Makron.
Makron sııaqty, Germanııa kantsleri Frıdrıh Merts te Pýtınniń sózderin «jaqsy belgi» dep atady, biraq bul «qajetti deńgeıden tym alys» ekenin atap ótti.
— Biz Máskeýdiń naqty kelissóz júrgizýge múmkindik beretin bitimge keliskenin kútemiz. Aldymen qarý tynýy kerek, sodan keıin ǵana pikirtalas bastalýy múmkin, — delingen Mertstiń AFP agenttigi keltirgen málimdemesinde.
Polsha premer-mınıstri Donald Týsk álem eshqandaı shartsyz, dereý bitimdi kútip otyrǵanyn aıtty.
— Bizdiń úndeýge jaýap retinde reseılikter 15 mamyrdan bastap beıbit kelissózderdi usyndy. Biraq álem eshqandaı shartsyz, dereý bitimdi kútip otyr. Ýkraına daıyn. Qurbandar jetkilikti, — dep jazdy H jelisinde.
AQSh prezıdenti Donald Tramp Pýtınniń bastamasyna tikeleı pikir bildirgen joq, biraq senbi kúngi oqıǵalardy «Reseı men Ýkraına úshin úmit syılaǵan kún» dep atady.
— Bul aıaqtalmaı kele jatqan «qandy qyrǵyn» toqtaǵan soń, úmittenemiz, júz myńdaǵan adamnyń ómiri saqtalady. Bul — burynǵydan da jaqsy jańa álem bolady. Men osyǵan qol jetkizý úshin eki tarappen de jumys isteýdi jalǵastyramyn, — dep jazdy ol.
Alaıda Tramptyń Truth Social jelisindegi jazbasynan onyń nege úmittenip otyrǵanyn naqty túsiný qıyn: Ýkraına odaqtastarynyń 30 kúndik bitim týraly ortaq talabyna ma, álde atysty toqtatýdan bas tartqanyna qaramastan Pýtınniń tikeleı kelissózge shaqyrýyna ma.