Eýropa avtosammıti: bolashaqtyń basty baǵyty — elektromobılder
ASTANA. KAZINFORM — Brıýsselde ótken Eýropalyq odaq bıligi men avtokólik ónerkásibi ókilderiniń joǵary deńgeıdegi salalyq sammıtinde EO-nyń 2035 jylǵa arnalǵan ekologııalyq maqsattary rastalyp, strategııalyq basymdyq elektromobılderge berildi, dep habarlaıdy Euronews.
Eýrokomıssııa tóraǵasy Ýrsýla fon der Lıaıen jetekshi avtokontsernder basshylarymen kezdesýde klımattyq beıtaraptyqqa kóshý josparyn naqtylady.
«Qalaı bolǵanda da, bolashaq elektromobılderge tıesili», — dedi kelissózder barysymen tanys derekkóz.
Avtokontsernder basynda kómirqyshqyl gazy shyǵaryndylary boıynsha maqsattardy jumsartýdy suraǵanymen, sarapshylar jahandyq básekelestik báribir bul talaptardy qoıyp otyrǵanyn atap ótti.
«Aldaǵy jyldary kóliktegi CO2 shyǵaryndylaryn qysqartýda elektromobılden artyq tehnologııa joq. Іshten janatyn qozǵaltqyshty saqtap qalý jónindegi pikirtalastar satyp alýshylardy da shatastyryp otyr», — dedi Audi kompanııasynyń bas dırektory Gernot Delner Wirtschaftswoche basylymyna bergen suhbatynda.
Fastned kompanııasynyń bas dırektory ári ChargeUp Europe prezıdenti Mıhıl Langezaal da osyndaı pikir bildirdi.
«Eýropa elektromobıldik transformatsııaǵa jetekshilik etýi úshin batyl qadamdarǵa barýy kerek. Bul ózgeris halyqqa da, bızneske de, qorshaǵan ortaǵa da tıimdi bolýy tıis», — dedi ol.
Sammıt «Strategııalyq dıalog» aıasynda ótti. Úsh saǵattyq talqylaýda qazirgi daǵdarystan shyǵý joldary qaraldy. Sala satylymnyń tómendeýi, energııa baǵasynyń qymbattaýy, Qytaı tarapynan básekeniń kúsheıýi jáne AQSh engizgen jańa tarıfterdiń kesirinen qysymǵa túsip otyr.
EO ónerkásip jónindegi komıssary Stefan Sejýrne buǵan deıin: «Avtoónerkásip ólim aýzynda tur. Bolashaq álemdik avtoónerkásip kartasy Eýropasyz syzylýy múmkin», degen edi.
ACEA eýropalyq avtokólik óndirýshiler qaýymdastyǵynyń bas dırektory Sıgrıd de Vrıs elektromobılderdiń naryqtaǵy úlesi áli 15,6 paıyz, júk kólikterinde 9 paıyz ekenin alǵa tartty. Onyń paıymynsha, ınfraqurylym men elektr jelileri jetkilikti deńgeıde damymaı otyr. Qazirgideı jaǵdaıda normatıvtik maqsattarǵa qol jetkizý múmkin emes. Elektromobılderdi tutynýshylarǵa tartymdy etý úshin júıeli yntalandyrý, salyqtyq ádildik, qýattaý qunynyń tómendeýi jáne oǵan qoljetimdilikti jeńildetý qajet.
Avtoónerkásip EO ekonomıkasynyń tiregi sanalady. Salada 13 mıllıonnan astam adam jumys isteıdi, bul Eýroodaq JІÓ-niń shamamen 7 paıyzyn quraıdy.
Aıta keteıik, álemde elektromobılderdiń satylymy artyp keledi.