Eýropa áýejaılarynda adam denesin skanerlep, kóshirý qurylǵysyn túgeldeı ornatýdyń ýaqyty kelgen joq

sebebi adam densaýlyǵy úshin qaýip tóndiredi jáne adam quqyǵy buzylýy múmkin.

Brıýsselde ótken jalpy otyrys barysynda Eýropalyq Odaqtyń Ekonomıkalyq jáne áleýmettik komıtetiniń ókilderi osyndaı málimdeme jasady, dep habarlaıdy osy vedomstvonyń baspasóz qyzmeti.

Buryn lańkestikke qarsy kúres aıasynda eýropalyq áýejaılarda adam denesindegi jarylǵysh zatty, esirtkini, qarý men ýly zattardy anyqtaı alatyn adam denesin skanerleý qurylǵysyn túgel ornatý kózdelgen edi. Jáne de áýejaıy qyzmetkerleri osy qurylǵy arqyly adam denesin kıim syrtynan kóre alady. Alaıda bul bastama adam quqyqtaryn buzý dep sanaıtyn Eýropa azamattary arasynda narazylyq týdyrdy.

Osyǵan baılanysty Eýropalyq odaqtyń Ekonomıkalyq jáne áleýmettik komıteti alańdaýshylyq tanytyp, áýe jolaýshylaryn tekseretin qazirgi tehnologııany ary qaraı paıdalana berýdi usyndy. Jáne de Eýroodaqtyń konsýltatıvti organy skanerleýdi paıdalaný adam densaýlyǵy úshin eshqandaı qaýip týdyrmaıtyndyǵy naqty dáleldenbeıinshe, bul qurylǵylardy paıdalanbaý týraly keńes berdi. Al eger áýejaılarda osyndaı qurylǵy ornatylǵan bolsa, jolaýshylarǵa tekserýdiń basqa ádisin tańdaý quqyǵy berilýi tıisti.