Eýropa armrestlıng federatsııasynyń vıtse-prezıdenti Shardaraǵa keldi
TÚRKІSTAN. QazAqparat - Túrkistan oblysynyń Shardara aýdanyna Evropa armrestlıng federatsııasynyń vıtse-prezıdenti Aleksandr Iakovıts keldi. Horvatııa armrestlıng federatsııasynyń prezıdenti shaǵalaly aýdandaǵy sportshylarmen tájirıbe almaspaq, dep habarlaıdy QazAqparat.
Aleksandr Iakovıts saparynyń maqsatyn búkil álemge tanylyp úlgergen Shardara armsport sport klýbyna kelýdi kópten beri oılap júrgendigimen túsindirdi. Ol osy komandaǵa kelip, chempıondarmen qaýyshqanyna óte qýanyshty ekenin aıtty. Sondaı-aq, mundaı jattyǵý zalyn buryn-sońdy kórmegenin jetkizip, tańǵalysyn jasyrmady.
Sheteldik qonaq armreslıngten álem chempıondarynyń jattyǵý barysyn beınekameraǵa túsirip, óz elinde maqtanyshpen kórsetetinin atap ótti. Osyndaı komanda qurǵan Arman Qarsybaevqa alǵysyn bildirip, jattyqtyrýshynyń kóptegen memleketter jetpegen jetistikterge jetip júrgen komanda daıyndaǵanyna qurmet kórsetti. Qazir atalǵan komanda qazan aıynda Týrkııa eliniń Antalııa qalasynda ótetin Álem chempıonatyna daıyndyq ústinde.
Aıta keteıik, Arman Qarsybaev daıyndaǵan shardaralyq komanda búginde álemdik deńgeıde úlken jetistikterge qol jetkizip keledi. Atap aıtqanda, komandanyń 24 sportshysy álem chempıony atansa, olardyń jeteýi eki dúrkin álem chempıondyǵyn jeńip alǵan. Al komanda bapkeri Arman Qarsybaev - Azııanyń 2004 jylǵy absolıýtti chempıony, Qazaqstannyń eńbek sińirgen jattyqtyrýshysy.
