Eýropa, AQSh jáne Qytaı ınvestorlaryn Qazaqstannyń qaı salalary qyzyqtyrady
ASTANA. KAZINFORM — Eýropa, AQSh jáne Qytaı ınvestorlary Qazaqstannyń taý-ken metallýrgııa salasyna, ásirese sırek kezdesetin metaldarǵa qyzyǵýshylyq tanytyp otyr. Sonymen qatar sheteldik kompanııalar aýyl sharýashylyǵy ónimderin óńdeý, logıstıka, tsıfrlyq tehnologııalar men jańartylatyn energetıka salalaryna qarjy salý múmkindigin qarastyryp jatyr.
Bul týraly «KAZAKH INVEST» UK» AQ basqarma tóraǵasy Sultanǵalı Kenjequlov aıtty.
Ulttyq kompanııa basshysynyń sózinshe, KGIR 2026 halyqaralyq ınvestıtsııalyq forýmyna qatysýshylar Qazaqstannyń dástúrli ónerkásip salalarymen qatar jańa tehnologııalaryna da nazar aýdarǵan.
— Qazir ınvestorlar sırek kezdesetin metaldarǵa erekshe qyzyǵýshylyq tanytyp otyr. Forýmǵa negizinen Eýropa elderinen, AQSh pen Qytaıdan delegatsııalar keldi. Olardy Qazaqstannyń taý-ken metallýrgııa kesheni, sonyń ishinde sırek kezdesetin metaldar salasy qyzyqtyrady, — dedi Sultanǵalı Kenjequlov.
Budan bólek, sheteldik bıznes ókilderi aýyl sharýashylyǵy ónimderin óńdeý, kólik jáne qoıma logıstıkasy, mashına jasaý baǵyttaryn da qarastyryp jatyr. Jasandy ıntellekt, kásiporyndardy tsıfrlandyrý jáne jańartylatyn energııa kózderine de suranys artyp keledi.
Sultanǵalı Kenjequlovtyń pikirinshe, salalardyń san alýandyǵy óndiristik jáne tehnologııalyq múmkindikteri ártúrli kompanııalarmen yntymaqtastyq ornatýǵa múmkindik beredi.
Aıta keteıik, IX Qazaqstandyq jahandyq ınvestıtsııalar jónindegi dóńgelek ústel 22 qazanda Shymkentte ótti. 2017 jyldan beri Astanada Premer-mınıstrdiń tóraǵalyǵymen uıymdastyrylyp kelgen forým bıyl alǵash ret elimizdiń ońtústiginde ótkizildi. Oǵan qalanyń ekonomıkalyq ósimi men ınvestıtsııa tartýdaǵy kórsetkishteri negiz bolǵan.
— Ótken jyldyń qorytyndysy boıynsha Shymkenttiń jalpy óńirlik ónimi 11 paıyzǵa ósti. Bul kórsetkish boıynsha qala respýblıkada ekinshi orynda tur. Sonymen qatar Shymkentke 860 mıllıard teńge ınvestıtsııa tartyldy. Onyń 70 paıyzdan astamy — jeke kapıtal. Biz úshin bul óte joǵary kórsetkish ári ınvestorlardyń osy óńirge, jalpy Qazaqstannyń ońtústigine qyzyǵýshylyq tanytyp otyrǵanynyń belgisi, — dep túsindirdi Sultanǵalı Kenjequlov.
Onyń aıtýynsha, forýmnyń Shymkentte uıymdastyrylýy halyqaralyq bıznes ókilderine elimizdiń ońtústigindegi jańa jobalarmen jáne óńirdiń ekonomıkalyq áleýetimen tanysýǵa múmkindik berdi.
Buǵan deıin Qazaqstan sırek metaldardy óńdep, Eýropaǵa daıyn ónim eksporttaıtyny habarlandy.
