Eýropa AQSh-tyń Grenlandııa qatysty talaptaryna jaýap berdi
ASTANA. KAZINFORM — Eýropalyq komıssııa tóraǵasy Ýrsýla fon der Lıaıen men Frantsııa prezıdenti Emmanýel Makron Davostaǵy Dúnıejúzilik ekonomıkalyq forýmda sóz sóıledi. Olar AQSh-tyń Grenlandııaǵa qatysty sońǵy talaptaryna túsinikteme berdi, dep habarlaıdy agenttiktiń menshikti tilshisi.
Dúnıejúzilik ekonomıkalyq forýmda Donald Tramp sársenbi kúni, ıaǵnı búgin sóz sóıleıdi. Jıynda Aq úı basshysy áli jaq ashpasa da, onyń Grenlandııany AQSh-tyń baqylaýyna berý týraly talaby forýmnyń ashylýynyń basty taqyrybyna aınalyp úlgerdi.
Tramp janjalǵa baılanysty baj salyǵyn salýǵa nıetti EO jáne basqa eýropalyq elder áli de ózderiniń jaýaptarynyń kúshin anyqtaýǵa tyrysyp jatyr.
Seısenbi kúni barlyq nazar Frantsııa prezıdenti Emmanýel Makron men Eýrokomıssııa tóraǵasy Ýrsýla fon der Lıaıende boldy.
Makron óz sózinde Frantsııa ǵylymdy qastandyq teorııalarynan, zań ústemdiginen — kúsh ústemdiginen, dıalogtan — qaýipterden artyq kóretinin atap ótti. Ol halyqaralyq quqyqtan jahandyq bas tartýǵa jáne ımperııalyq ambıtsııalarǵa qaıta oralýǵa qarsy ekenin eskertti.
— Álem halyqaralyq quqyq buzylatyn jáne jalǵyz zań kúshtilerdiń zańy bolyp kórinetin erejesiz álemge aýysýdy bastan keshirip jatyr. «Jańa otarshyldyqty» qabyldaý maǵynasyz, — dep ashyq aıtty Frantsııa prezıdenti.
Sondaı-aq forýmǵa qatysýshylar Makronnyń kúnnen qorǵaıtyn kózildirik kıgenin baıqap, bul onyń kórý qabiletiniń nasharlyǵyna baılanysty bolýy múmkin ekenin atap ótti.
Óz kezeginde Ýrsýla fon der Lıaıen Eýropanyń amerıkalyq tarıfterge jaýabyn «batyl jáne oryndy» dep jarııalady.
Buǵan deıin Eýrokomıssııa tóraǵasy AQSh-tyń qoqan-loqqylaryn, ásirese, odaqtastar arasynda «qatelik» dep ataǵan bolatyn. Mundaı áreketter transatlantıkalyq qarym-qatynastardy tómendeý spıraline túsirip jiberýi múmkin ekenin aıtyp, Trampty odan saqtandyrǵan edi.
— Bizdiń jaýabymyz batyl, birikken jáne oryndy bolady, — dedi ol EO-nyń yqtımal qarsy sharalary týraly.
Esterińizge sala keteıik, Donald Tramp Danııaǵa tıesili Grenlandııaǵa kez kelgen ádispen baqylaý ornatýǵa nıetti ekenin málimdegen. AQSh prezıdenti buǵan sebep retinde ulttyq qaýipsizdik múddelerin alǵa tartady.
Ótken demalys kúnderi Tramp óz talaptaryn oryndaýdan bas tartqany úshin Eýropanyń 8 elinen, sonyń ishinde Germanııadan keletin taýarlarǵa jańa baj salyǵyn jarııalady. Sondaı-aq Aq úı basshysy Makron jáne Rıýttemen aradaǵy jeke jazbalaryn jarııalady.