Eýropa AQSh tarıfterine bola azyq-túlik standarttaryn ózgertpeıdi

ASTANA.KAZINFORM – Seısenbi kúni Eýropalyq komıssııa AQSh prezıdenti D.Tramptyń EO taýarlaryn baj salyǵyn engizýine baılanysty agroóndiris pen tsıfrlyq qyzmetter salalary boıynsha óziniń zańdaryn jumsartý múmkindigin joqqa shyǵardy, dep habarlaıdy Kazinform  menshikti tilshisi.

Alaıda Euractiv málimetteri boıynsha, Eýrokomıssııa transatlantıkalyq saýdada tarıfterge qatysy joq kedergilerdi joıýǵa qarsy emes.

- Azyq-túlik, densaýlyq jáne qaýipsizdik standarttary: bul qyzyl aımaq, - dedi Eýrokomıssııa ókili Olof Gıll jýrnalısterge.

— Bul kelissózderdiń bóligi emes, tehnologııa men tsıfrlyq naryqtarǵa qatysty retteý.

Bul pikir EO Saýda komıssary Marosh Shefchovıch keshe Vashıngtonda AQSh sheneýnikterimen kezdesip, Brıýsseldiń AQSh-pen saýdadaǵy «tarıftik emes kedergilerdi» alyp tastaýy múmkin degen usynysynan keıin aıtyldy.

Olof Gıll Eýropalyq komıssııanyń AQSh ókilderimen «birqatar másele» kótergenin, biraq qandaı erejelerdi qaıta qaraýǵa bolatynyn naqtylaýdan bas tartqanyn aıtty.

AQSh sheneýnikteri EO-nyń joǵary aýylsharýashylyq azyq-túlik standarttary men Apple, Google jáne Meta sııaqty amerıkalyq tehnologııalyq kompanııalarǵa qatysty monopolııaǵa qarsy tergeýin birneshe ret aıyptady.

31 naýryzda jarııalanǵan AQSh Saýda ókiliniń (USTR) 400 bettik esebinde syrtqy saýdaǵa kedergi retinde EO-nyń azyq-túlik qaýipsizdigi jáne qorshaǵan ortany qorǵaý zańdarynyń keń aýqymy, sonyń ishinde genetıkalyq túrlendirilgen organızmder, maldaǵy antıbıotıkter jáne pestıtsıdterge shekteýler týraly zańdar keltirilgen.

D.Tramp Eýropany hlormen óńdelgen amerıkalyq taýyq etine uzaq ýaqyt tyıym salǵany úshin de synǵa aldy.

Vashıngton sonymen qatar EO-nyń amerıkalyq taýarlardy kemsitetin QQS mólsherlemesin aıyptady. Alaıda bul talapty Komıssııa jáne EO-nyń kóptegen táýelsiz sarapshylary qabyldamady.

Ótken aptada Tramp AQSh-tyń barlyq saýda seriktesterine jappaı «ózara tarıfterdi» toqtatty, sonyń ishinde EO-ǵa 20% alym, Brıýsseldi AQSh taýarlaryna qatysty óziniń jaýap tarıfterin 90 kúnge toqtata turýǵa shaqyrdy.

Alaıda, Tramptyń bolatqa, alıýmınııge jáne avtomobılderge 25% baj salyǵy, sondaı-aq AQSh ımportyna 10% «barlyǵyn ustaý» bajdary kúshinde qalady.

Buǵan deıin D.Tramp tarıfter kúnine 2 mıllıard dollar tabys ákeletinin aıtqan bolatyn.