Eýropa 2022 jylǵy qysqy Olımpıadany ótkizýden bas tartýda
ASTANA. QazAqparat - 2022 jylǵy qysqy Olımpıada Mıýnhenge de, Davosqa da, Osloǵa da, al endi Krakovqa da qajeti joq. Bul eýropalyq qalalar 2022 jylǵy qysqy olımpıadalyq oıyndardy ótkizýge ázir bolatyn, endi saıyp kelgende bul josparlarynan bas tartyp otyr», dep habarlady Sports.kz Inosmı.rý-ǵa silteme jasap.
Dúısenbi kúni Polsha Krakovty 2022 jylǵy olımpıadalyq oıyndar astanasy etý týraly oıynan aınydy. Oǵan referendým nátıjeleri sebep boldy, onda daýys bergen halyqtyń 70 paıyzy oǵan qarsy boldy.
2013 jyldyń naýryzynda Shveıtsarııa jáne Graýbıýnden kantonynyń halqy, al qarashada bavarlyqtar Mıýnhenniń kandıdatýrasyna qarsy shyqty, alaıda olardyń ekeýi de resmı ótinish bergen joq. Stokgolm orta jolda dodadan shyǵyp qaldy: bılikke kelgen jańa qońyrjaı partııa jarysty qarjylandyrýǵa kelisimin bermedi.
Norvegııalyq Osloǵa keler bolsaq, onyń kandıdatýrasy da kúdik uıalatyp otyr. Qoǵamdyq pikirde jobaǵa rıza emester qatary kóbeıýde, al Progress partııasy jaqynda ony qarjylandyrýǵa qarsy daýys berdi. Al Lvovtyń kandıdatýrasyn tipti eske almaǵan durys. Ýkraındyqtar úshin olımpıada basymdyqty mindetter qataryna kirmeıdi.
Sóıtip, 2022 jylǵy oıyndar quqyǵyna alty úmitkerden Beıjiń men Almaty ǵana qalyp otyr.
Mundaı jobany qarjylandyrýdyń orasan zor quny birqatar qalalardy qorqytyp otyr. le Monde-niń sport blogynda London mysalǵa keltirilgen: brıtandyq astana 8,92 mlrd. fýnt sterlıngi (11 mıllıard eýroǵa jýyq) qarjy jumsady, al qorytyndysynda 2,1 mıllıard qana aldy (2,5 mlrd.eýro). Sochı oıyn quny jóninen absoltıýttik rekord ornatyp, 50 mlrd mejege jetti.
Shved saıasatkerleri «olımpıadalyq oıyndardy uıymdastyrý orasan zor ınfraqurylymdyq nysandar salýdy talap etedi, olar ádette birneshe apta paıdalanylady, sońynan bosqa qalady», degen ýájderin aıtady.
Mıýnhen azamattary sonymen qatar HOK-tiń róline de rıza emes. «Jasyldar» partııasynan Lıýdvıg Hartmann referendýmnan keıin: «Daýys berý qorytyndylary sportqa qarsy dabyl emes, HOK-tiń ashyqtyǵy men tabys qýalaýyna qarsylyqty bildiredi. Qazir kez kelgen nemis qalasynyń kandıdatýrasy týraly áńgime bolmaýy tıis. Aldymen HOK ózgerýi tıis. Qalalar HOK-qa qaraı emes, HOK qalalarǵa burylýy tıis» dedi.
